Masing mejah sida ti bejaku selebubu ngapa di media rama. - Berita Iban Online

Header Ads

  • Baru Nyadi

    Masing mejah sida ti bejaku selebubu ngapa di media rama.

    KUCHING: Sapit Kepala Menteri Tan Sri Datuk Amar Dr James Jemut Masing mejah sekeda orang di media rama ke semina bejaku selebubu ngapa lebuh seraban tuai rumah ari Kanowit ke dibai betemu enggau Menteri Besai Datuk Seri Mohd Najib Tun Razak, nepan bilun sedadu lebuh terebai ke Kuala Lumpur.

    “Keterubah nya, sigi amat aku nadai belanja deka mai raban tuai rumah ari Kanowit enggau Kapit ngagai Kuala Lumpur betemu enggau Menteri Besai ngena bilun komersil.

    “Tang utai ke enda ditemu orang ba media rama, kebuah mai seraban tuai rumah ari Kanowit enggau Kapit ngena bilun sedadu ngagai Kuala Lumpur, laban satu-per-tiga tuai rumah ari Kanowit ke enggau ngagai Kuala Lumpur tu iya nya orang ke kala beperang enggau komunis maya konfrontasyen kelia, dalam taun 1970-an.

    “Ngena bilun sedadu tu, basa ari sedadu ngagai bala tuai rumah ke ngenang pengawa sida iya ngetanka menua kelia. Tu pemanah sedadu ngagai raban tuai rumah tu,” ku iya.

    Iya madah lebuh berandau enggau sedadu pasal ngena bilun tu, sedadu ngemendarka raban tuai rumah ngena bilun nya, laban berundingka raban tuai rumah tu kala enggau ngetanka menua lebuh dikeruga raban komunis di Ngemah enggau Kanowit.

    “Nya naka ke ulih dibantu sedadu, munyi ke ‘mayar pulai baru’ pemanah tuai rumah sereta komuniti Iban di sitak nya beperang enggau komunis. Enda patut orang mantah pasal pengawa nya. Media rama, nama utai ke ditemu sida iya, laban sida ukai ari sitak nya, sida iya enda nemu bakani komunis ngeruga menua dalam jeman nya,” ku iya.

    Enti penyakal deka mantah pasal pekara nya ku iya, anang semina meratika penyampau duit ringgit aja, tang beterima kasih ngagai komuniti sereta mensia mayuh ke udah beperang enggau komunis, laban enti nadai bala Iban tauka tuai rumah bansa tu, kitai empu nadai di menua tu, ku iya.

    “Nyema orang madahka aku bisi agenda dipelalaika aku, sigi bisi, lalu agenda belalai nya, raban tuai meri terima kasih ngagai Menteri Besai, ke udah mantu sida iya.

    “Menteri Besai pan udah suah kitu (ke Sarawak), tang raban tuai rumah tu pan deka meda Kuala Lumpur, lalu penatai kami di Kuala Lumpur disambut enggau manah, lalu dibai merarau di Sri Perdana. Sri Perdana tu palan alai Menteri Besai ngenah tuai pemesai menua bukai nyengkaum ke penudi iya endar endur nya Raja ari Saudi Arabia,” ku iya.

    Dalam randau enggau Menteri Besai, Masing ti mega nyadi Menteri Pemansang Infrastruktur sereta Pengangkut madahka randau sida minta Menteri Besai meri geran kena ngaga jalai sereta minta bisi sedadu nyaga tiga buah tekad ai di sitak nya.

    “Ba seberai garis menua, jalai digaga nuju Lawas terus ke garis entara menua, ari sepiak kami (Kanowit enggau Kapit sigi nadai), lalu enti bisi sebarang penanggul ke nyadi, orang ari seberai nya muntang endar ngagai kandang endur nya.

    “Utai ke berega endar ke kenadai kami, alai tiga buah tekad ai nya, nadai seiku pan sedadu ke bejaga dia. Nyema orang enda manah ati, datai lalu ngachau tekad ai nya, nama penyadi kami? Aku kala berandau enggau Menteri Besai sereta Menteri Ngetanka Menua Dato Seri Hishamuddin Tun Hussein nyengkaum sedadu pasal pekara nya.

    “Nya alai, bisi tuju pejalai kami ngagai Kuala Lumpur, iya nya minta ngaga mayuh agi jalai. Siti agi pemerat, iya nya sida ke dipindah ngagai Ngungun enggau, satu-per-tiga dipindahka ngagai Ulu Ngemah maya konfrontasyen kelia,” ku iya.

    Diatu komunis udah alah, kitai pan diau enggau likun, tang sekeda raban tuai rumah tu deka pindah pulai baru ngagai menua asal sida, lalu enti deka mulaika diri baru ngagai menua asal sida iya, jalai enda tau enda digaga.

    “Menteri Besai udah ngemendarka pengawa ngaga jalai nya, diatu komunis nyau nadai agi, lalu raban tuai rumah tu deka pulai baru ngagai menua asal, tang jalai enda tau enda digaga,” ku iya.

    Pemanjai jalai ke patut digaga di sitak nya, dalam 30 km enggau pemayuh mensia ke dipindah ngagai palan pengentap baru di Ngungun, Jagau enggau Sekuau dalam 20,000 sereta pemayuh rumah panjai, dalam 40 buah rumah panjai.

    “Ungkus ngaga jalai 30km dalam setengah billion, lalu deka digaga berenggat. Penyampau RM50 juta udah diberi Perintah Besai, lalu (design) pan udah digaga kena ngaga jalaike pengabis jauh di utara, Ngemah lalu ari nya ngagai Nanga Semujan , nya ke asal rumah panjai dalam penyauh 21km, endang nadai jalai, babas aja,” ku iya, lalu nandu baru sida tu udah dipindah ngagai palan pengentap baru dalam kandang 40 taun tu ke udah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads