Header Ads

  • Berita Tebaru

    Mensia mayuh ngarapka jalai ngelawa Nanga Dap Kanowit ulih dikemanah

    NGANDALKA JALAI TU: Mensia mayuh ti ngelawa Nanga Dap, Kanowit ngarapka jalai nya dikemanahka agi.
    SIBU: Sida ke betengah jalai ngelawa Nanga Dap, Kanowit andal jalai nya ulih dikemanahka agi sereta disikap enggau nama ke patut dikena nyeliah penusah enda disadang nyadi.

    Jalai tu digaga ngelawa Pasar Nanga Dap, genturung rumah panjai, Sekula Sekondri (SMK) Nanga Dap enggau Sekula Primari Nanga Dap.

    Nitihka penerang ari sekeda mensia mayuh, jalai nya enda ulih ditengah kerita mit kelimpah kerita besai lebih agi maya tauka udah hari ujan.

    “Jalai tanah tu enda ulih ditengah sida ke ngena kerita mit.

    “Bisi penusah tepawah kala nyadi ditu laban jalai lichin,” pia ku penerang ke dikirum nengah WhatApps, kemari.

    Kelimpah ari nya, jalai tu mega empai digagaka papan kelai tauka pal jalai dikena ngelai jalai ke betiku ti nejuka mensia mayuh tau saru tauka enda ngadang maya nengah endur ke enda likun ba jalai nya.

    Mensia mayuh mega bangat irau laban jalai nya kelalu renjan.

    Penerang madahka jalai nya diatu benung diperunding deka dikemendarka dikena mensia mayuh.

    Ketegal nya, mensia mayuh ti betengahka jalai nya ngarap piak ti bekaul ulih berunding mutarka penanggul ti bisi ditapi mensia mayuh dia.

    Tu nyengkaum minta pengari rayat datai ngabas jalai nya lalu berundingka chara dikena ngemanahka jalai enggau lengkas.

    Naka ke diatu, sida dia andal amat piak bekaul tau naburka batu mit dulu ngambika ulih dikena semua bansa kerita enda ngira besai tauka mit.

    Ukai semina nya, pal jalai meseti digaga ba endur betiku tauka ba palan ke engkeman sebedau penusah enda disadang nyadi.

    “Ngarapka pengerenjan jalai tu dilandaika agi ngambika mensia mayuh semampai likun maya nurun lalu nyeliahka penusah tepawah nyadi,” ku penerang nya nambah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: