Mensia mayuh ngarapka lubang di Jalai Paradom diseruri enggau lengkas. - Berita Iban Online

Header Ads

  • Baru Nyadi

    Mensia mayuh ngarapka lubang di Jalai Paradom diseruri enggau lengkas.

    NASIT AGI NYANGKUNG: Seiku indu benung nganti bala iya datai ngesah ngaduka tayar.

    SIBU: Mensia mayuh ti betengahka Jalai Paradom semampai nangi belama lebuh ti nengah jalai nya ketegal irauka diri enda ulih nyeliahka lubang ti bisi ba jalai nya kelebih agi maya tauka sepengudah ujan bangat.

    Nitihka dipadah sida ti ninting hari nengah jalai nya, jalai tu suah belubang dalam kandang dua taun tu.

    Kelimpah nangika diri tepawah tauka bebadi, lubang tu bela nejuka sida ke beempu perengka pengangkut baikka mutosikal tauka kerita napi pengerugi besai laban enti enda mujur teseliahka lubang tayar enggau ‘rim’ sida endang enda ulih diguna agi udah nya.

    Pagi kemari aja, tiga buah kerita panchit tayar ketegal enda ulih nyeliahka lubang ke besai ba jalai nya.

    “Kami enda ngadang jalai tu belubang laban jalai tu lurus kelimpah lubang endang enda dipeda ari jauh.

    “Tang benasit bendar semina tayar aja panchit,” pia ku seiku ari sida ke semina deka dikelala enggau nama Muaz aja.

    Ku Muaz, iya enggau dua iku agi bakih iya ari Kabong benung deka ngelawa ke Sibu sebedau penusah nyadi.

    Nangika pekara nya nyadi ba orang bukai, Muaz andal amat piak ti bekaul ulih berundingka chara baka ni ngalitka lubang ti nyadi sepengudah hari ujan baka kilah ensana.

    Maya tu mega, iya enggau bakih iya ngelai lubang ke ditengah kerita sida ngambika orang bukai nangkan sida ulih nyeliah lubang nya.

    Kelimpah ari sida tiga, seiku agi ti ngasaika penusah ti sebaka iya ke semina deka dikelala enggau nama Roslan.

    Roslan maya tu deka nganjung bala iya ke Padang Bilun Sibu ari Saratok sebedau tetengahka lubang nya.

    Baka penemu Muaz, iya bela ngarap penusah ke sebaka enda nyadi ba orang bukai.

    “Kitai minta perintah berundingka chara ngiga penemu mutarka pekara tu sebedau penusah enda disadang nyadi,” ku iya ti maya nya benung nganti tayar ke dianjung bala iya ari Sibu.

    Kelimpah penusah ke nyadi nya kemari, sebedau tu endang suah dipeda kerita ngetu ba tisi jalai ngaduka tayar panchit ketegal tetengahka lubang ba jalai nya.

    Penusah bebadi bangat dikenangi kelebih agi maya malam hari tauka maya ujan bangat laban ukai semina lubang enda dipeda tang jalai tu nadai lampu jalai.

    Piak ti bekaul endang sigi datai ngalitka lubang sepengudah nemu jalai nya belubang tauka maya siang hari udah hari bangat ujan malam hari.

    Tang taja udah dialit, lubang deka nyadi baru sepengudah ujan nejuka pekara tu ngenataika pengirau mensia mayuh ti nengah jalai nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads