Miri deka ngemansangka projek agro-dagang temuai. - Berita Iban Online

Header Ads

  • Baru Nyadi

    Miri deka ngemansangka projek agro-dagang temuai.

    PROJEK DUA DALAM SATU: Lee (duduk, dua kiba) begulai enggau bala kaban kaunsil ti datai ngulu aum keterubah nya.

    MIRI: Mengeri Miri deka bejalaika pengawa dua dalam satu iya nya ngemansangka industri dagang temuai ti bepelasarka pengawa betanam, berikan enggau betupi tauka dikelala enggau nama agro-dagang temuai.

    Kandang endur pengawa betanam betupi enggau ngeluarka pemakai ti dilangkar beberapa buah gempung orang bumai, orang betanam enggau berikan ditu, deka dibantai sereta dipejurai ngagai Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas, enda lama agi.

    Menteri Muda Dagang Temuai, Seni enggau Main Asal Sarawak Datuk Lee Kim Shin madah, pekara nya udah dikerandau enggau Uggah sebedau tu lalu iya (Uggah) bela optimis ba pengawa nya.

    “Berebak enggau nya, tu deka dikemansang nyadi palan pematak temuai baka ti dikemansang di Taiwan.

    “Kitai bisi berandau bekaul langkar projek nya enggau Uggah, lalu nengah prinsip nya iya besetuju deka ngiga siti palan di Miri ngambika diangkat nyadi kandang endur betanam enggau ngeluarka asil, akuakultur, betupi sereta ke bukai.

    “Perambu bekaul kandang endur tu ila ti diberi nama ‘Taman Kekal Pengeluaran Makanan’ deka dibantai ngagai Uggah lalu kitai mega deka mantaika ngagai Opis Betanam Betupi ngambika nemu taba ti engkeman ba tuju nya,” ku iya seraya nambah, perintah nengeri mega deka ngemansangka infrastruktur baka jalai, bekal ai enggau elekterik di kandang menua nya ila.

    Ngelansa silik ku Lee, projek ‘Taman Kekal Pengeluaran Makanan’ deka diberi ngagai raban ti betupi, orang bumai tauka pekebun sayur enggau komersil.

    “Pia mega orang bumai kitai ditu, bulih penemu nya pengudah penemuai 38 iku orang bumai ari Miri begulai enggau Sapit Kepala Menteri (Uggah) ke Taiwan dalam bulan September tu tadi lalu sida mayuh belajar bekaul enggau chara betanam betupi moden ti betukar nyadi palan ngelantangka ati enggau dagang temuai,” ku iya nampung.

    Iya mansutka jaku nya ngagai pengarang berita ditu rambau aum pengarang berita pengudah ngetuaika aum keterubah Kaunsil Pemansang Pengawa Betanam Betupi Sitak Parlimen (MPPP) Miri di Opis Pelilih Miri.

    Sama bisi datai Pemesai Pelilih Miri Abdul Aziz Mohd Yusuf, pengari ari Opis Menteri Betanam Betupi Moden, Tanah Adat enggau Pemansang Kandang Menua, pengari ari Opis Dagang Betanam Betupi Perintah Besai (FAMA) Bagi Menua Miri, pengari ari Opis Betabam Betupi, pengari ari Opis Berikan enggau pengari ari Opis Tasik Bagi Menua Miri, komiti Gerempung Orang Bumai Kandang Endur (PPK) Miri, Serakup Raban Penanam Bagi Menua Miri sereta Serakup Orang Berikan Endur (PNK) Miri.

    Kelimpah ari nya, aum nya mega bisi bejurai bekaul enggau perambu minta perintah nengeri berunding ngambi ngemendar pengawa ngambi pekereja menua luar di kebun enggau ladang ti digaga komersil.

    “Diatu, orang bumai enggau pekebun kitai betapi enggau penanggul suntuk pekereja enggau tebal agi sida bekebun enggau betanam kediri empu lalu disaup diri sebilik.

    “Penanggul suntuk pekereja tu ti natak pengeluar asil betanam sida ti ngejung enda tetangkupka peminta makit menua tu,” ku Lee nerang baru.

    Ke diatu ku iya, bisi 600 iku orang bumai enggau pekebun nyengkaum sida ti betupi chakah gawa di Miri lalu sida ngeluarka asil di kandang tauka tanah sida empu ti semina tiga ngagai empat ikar pemesai ti agi enda chukup.

    Ba lansa bukai, Lee madahka aum merambu deka ngadaka ekspo betanam betupi di Miri dalam pun bulan Disember tu ila, ti deka ngempung semua pekebun, peladang, sida ti betupi enggau orang berikan, ngambi mandangka asil ti dikeluarka sida empu sereta nyual asil nya ngagai mensia mayuh. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads