Naroden: Titihka ubah pemansang teknologi moden. - Berita Iban Online

Header Ads

  • Baru Nyadi

    Naroden: Titihka ubah pemansang teknologi moden.

    KELAI PESERETA TEMBU NYERETA WOKSYOP: Naroden (dua kiba) nyuaka setipikit tembu worksyop ngagai pengari penyereta di Kuching kemari. Bela dipeda Kamri(kiba).

    KUCHING: e-dagang sebengkah chara baru ba pengawa dagang lalu chara tu enda ulih diseliah, ku Menteri Muda Dagang Antarabansa enggau e-Dagang Datuk Mohamad Naroden Majais.

    Ku iya, enti orang dagang tauka orang baru ba pengawa dagang enda nguna e-dagang, sida deka jauh tinggal ari orang bukai.

    “Teknologi ke pemadu jampat napi ubah, nyauka tetiap enam bulan kitai meda teknologi baru ditempa.

    “Teknologi tu ngubah chara kitai ngereja pengawa enggau bekunsi penerang,’ku iya.

    Naroden mansutka jaku nya rambau bejadi lalu nutup Worksyop Dagang Chara Online ke diatur di sebuah hotel ditu, kemari.

    Iya nambah, e-dagang meri peluang sama rata ngagai semua orang dagang lalu produk sida ukai semina dikelaku dalam menua aja tang dikelaku mega ba menua luar.

    “e-dagang nguna teknologi internet ti meri peluang ngagai kitai ngelaku, nganjung sereta bekunsi penerang sentang produk nengah telefon pintar tauka laptop.

    “Kitai ulih ngadu komunikasyen enggau pemeli lalu ngemujur atur mayar nengah online,’ku iya.

    Berindik enggau nya ku iya nambah, kitai nadai chara bukai kelimpah ari nguna teknologi moden ke jampat sereta efisyen.

    Worksyop Dagang Chara Online ke diatur dua hari berunggu digulu raban orang dagang enggau sekeda orang ari ejensi perintah.

    Bela bisi datai, Sekretari Mendam Opis Menteri Dagang Antarabansa enggau e-Dagang Kamri Affendi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads