Header Ads

  • Berita Tebaru

    Nembiak sekula di menua pesisir patut ransing, liat ati ngulihka pemujur pelajar

    Dennis Ngau
    MIRI: Nembiak sekula di menua pesisir seruran dipadah bekaul enggau pemesai guna pelajar enggau nguasa penemu pengelandik dikena nyediaka diri napi makit kereja ti majak mar.

    Kaban Kunsil Nengeri (ADUN) Telang Usan, Dennis Ngau madah, ari pengeransing enggau pengeliat ati sida, bala nembiak di menua ulu ulih nyapai pemujur baka bakih sida di mengeri.

    “Semina siti aja chara dikena sida pansut ari penyeranta iya nya nengah pelajar. Nya alai, aku suah ngingatka bala nembiak di menua ulu kelebih agi di Telang Usan ngambi naka ulih ngena memanah awak besekula, ransing belajar lalu teulihka pemujur dalam pengidup.”

    Dennis mansutka jaku nya rembau bejadika Pengawa Makai Selamat Merekat Bala Nembiak SPM & STPM Taun 2017’ di Balai Komuniti Long Lama apin lama ke udah.

    Pengawa tu mega udah digulu 127 iku chalun Sijil Pelajaran Malaysia (SPM) enggau 57 iku chalun Sijil Tinggi Persekolahan Malaysia (STPM), ti deka napi peresa berengkah ari bulan November nyentuk Disember taun tu.

    “Ari penambah ba penyampau sida ke bisi diploma enggau degre diatu, makit kereja majak kompetitif lalu penyulut akademik endang balat dikemerat.”

    “Nya alai bala nembiak anang ilap lalu rebut tetiap awak ke bisi laban pengidup dudi hari bepanggai ba jari kita empu,” ku Dennis.

    Ku iya, peresa SPM enggau STPM endang beguna endar laban deka nentu sereta nyamin penuduk sida di palan pelajar tinggi ila.

    “Aku ngarapka semua piak nyengkaum bala pengajar, bala bakih enggau diri sebilik enda berati tang beratka pelajar, seliah diri ari pekara ti enda patut.”

    “Tu meh awak ti patut endur sida milih batang pengawa ngambika muntang ngatur perambu,” ku iya.
    Dennis mega muji pemanah pengawa Gerempung Apai Indai enggau Pengajar (PIBG) ngatur pengawa sehari nya lalu ngarapka iya deka seruran diatur dudi hari, nyadika peransang ngagai bala nembiak nyapai penyulut.

    “Aku ngarapka kitai ulih nempa mayuh agi peranak Telang Usan ti ngembuan pelajar tinggi sereta ulih besemekih enggau menua luar lalu ulih pulai gawaka komuniti sida,” ku Dennis.

    Beserimbai enggau pengawa sehari nya, bala nembiak enggau apai indai mega bisi ngatur pengawa besembiang sereta ngedutka pemanah kaul begulai enggau apai indai, bala bakih enggau pengajar.

    Sama bisi datai Prinsipal SMK Long Lama Matthew Laing Ngau, Chairman PIBG Pastor Thomas Anyi enggau Pemesai Ngatur Pengawa Ezra Uda.

    SMK Long Lama ngembuan lebih 600 iku nembiak enggau lebih 60 iku pengajar, entara sekula le pemadu besai di sitak Telang Usan. #UtusanBorneo

    No comments

    Post Top Ad