Ngarap bisi belanja tambah ke pemansang menua pesisir. - Berita Iban Online

Header Ads

  • Baru Nyadi

    Ngarap bisi belanja tambah ke pemansang menua pesisir.

    Nengah RECODA mayuh projek pemansang dilangkar ungkup pemaik peranak di kandang menua pesisir.

    MIRI: Pengawa bejuraika Bajet 2018 ari Menteri Besai Datuk Seri Najib Tun Razak kena 27 Oktober tu dikearap bisi ngungkupka belanja tambah ngagai pemansang menua pesisir.

    Kaban Kunsil Nengeri (ADUN) Telang Usan, Dennis Ngau madahka agih belanja abis nadai RM5 biliun dikena bejalaika projek pemansang di kandang menua pesisir.

    “Kitai bisi Ejensi Pemansang Tanah Tinggi (HDA) dalam Komiti Pemansang Koridor Wilayah (RECODA) ti ulih bejalaika sekeda projek ungkup peranak ditu,” ku iya madah ngagai Utusan Borneo kemari.

    Sekeda ari projek ti disebut iya nya ngaga jalai alun belakin ari Long Lama ngagai Pelilih Mit Long Bedian sereta ngagai Long Iman Mulu enggau Pasar Lapok ngagai Ulu Tinjar.

    Nitih ku iya, penumbuh raban khas HDA iya nya ari buah runding Kepala Menteri Datuk Patinggi Abang Johari ti meri pemerat ngagai pemansang di kandang tanah tinggi menua pesisir.

    HDA ti betuaika Sapit Kepala Menteri Sarawak Datuk Amar Douglas Uggah Embas, pengari rayat sitak Kunsil Nengeri (DUN) Telang Usan, DUN Mulu, Parlimen Baram enggau Lawas sereta sekeda opis menteri.

    “Nengah langgur ti silik sereta meruan, aku andal tetiap agih belanja ti diungkupka perintah besai deka mai pemaik ngagai rayat di sitak DUN Telang Usan enggau Mulu,” ku iya nerang.

    Ku Dennis penemuai Abang Johari ngagai Ulu Baram enda kurang ari tiga kali udah nyengala ngayanka perintah nengeri meretika peminta peranak menua pesisir.

    “Kededua sitak DUN Telang Usan enggau Mulu tu agi jauh tinggal ari sukut perengka guna pemun baka jalai belakin, tiang komunikasyen, bekal ai beresi, elekterik enggau ke bukai,” ku iya.

    Dennis mega ngarapka perintah beranakka puku dikena nyungkak ekonomi peranak menua ulu nengah muka kilang sawit enggau palan ngumpul asil betanam betupi sereta asil pengelandik jari.

    “Kitai andal amat pengawa mantaika Bajet 2018 sekali tu ukai semina ngurangka ungkus belanja idup rayat tang mega ngagihka belanja nitihka peminta peranak menua pesisir,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads