Header Ads

  • Berita Tebaru

    Nyalau meri penerang ketegal ti enda ulih datai ngerami PRS ke-13

    Datuk William Nyalau Badak
    SRI AMAN: Kaban Kaunsil Supreme Parti Rakyat Sarawak (PRS) Datuk William Nyalau Badak madah iya enggai rayat ngaga peragam ngapa pasal penaluk iya berindik ari iya ke enda datai ba pengerami makai lemai penumbuh PRS ke-13 ditu malam Hari Minggu.

    Kaban Parlimen (MP) Lubok Antu nerang iya udah madah ngagai Chairman Pengatur Dato Sri Doris Sophia Brodie, nama kebuah iya enda ulih datai ngulu pengerami lemai nya.

    Iya nerang ke alai iya enggai laun ngulu pra-aum kaunsil Bajet Nasional 2018 Barisan Nasional (BN) di Kuala Lumpur kena Hari Minggu.

    “Tu aum tetutup (sereta agenda aum), ukai dipandang ngagai mensia mayuh. Bala MP enggau Senator ari BN meseti ngulu aum nya.

    “Aku mega udah ngirum pesan jaku pandak ngagai iya (Doris) enggau raban chat ‘Whatsapp Kaunsil Supreme PRS’ madahka diri minta ampun laban enda ulih datai ngulu pengerami lemai nya,” ku iya lebuhka dikerandau di Kuala Lumpur.

    Iya nyematak madah Menteri di Opis Menteri Besai enggau MP Selangau Datuk Joseph Entulu Belaun enggau MP Kanowit Datuk Aaron Ago Dagang, mega bisi di Kuala Lumpur ngulu aum BN nya.

    “Aku udah meli lima iti mija ungkup bala kaban PRS Engkilili enggau Batang Ai,” ku Nyalau, ngayanka penaluk iya ngagai parti.

    “Pengerami ngintu penumbuh parti tu ke amat diperambu deka diatur kena 21 Oktober, ke alai aku ngenukuka diri ulih datai, tang udah nya sida ngelanjar ngagai 22 Oktober lalu tu beserimbai enggau pra-aum kaunsil BN kami ti betuaika Menteri Besai Datuk Seri Najib Tun Razak (ke mega Chairman BN). Nya alai aku milih diri ngulu pra-aum kaunsil ke alai ba runding aku ti nyadi MP, udah nyadi tanggungpengawa aku ngulu aum nya.

    “Nyema nya kebuah dikena sida nuduh aku enda talukka parti, aku endang enda setuju. Semina Tuhan aja nemu pekara nya enda amat,” ku iya asa.

    Iya nimbal jaku dipansutka Presiden PRS Tan Sri Dr James Masing enggau Doris rambau atur pengerami lemai nya, minta bala kaban ngambika taluk sereta angkunka parti, runding ti ulih kereja beraban enggau komitmen mega nyadi sebagi ari pekara penyerakup parti.

    PRS bisi tagit nempa sejarah nyadi parti bansa Dayak keterubah nudukka chalun indu dalam pengawa bepilih besai lalu bisi berita madahka entara Nyalau enggau Entulu nyangka deka dipinta nyurutka diri dikena meri awak ngagai chalun indu.

    Rambau atur pengerami makai lemai ke diatur Raban Indu PRS malam Hari Minggu, Masing ngenukuka penetap parti deka nudukka siku tauka dua chalun indu.

    Iya mega nyemetak madahka raban indu ti deka dikirai nyadi chalun nyilih sida ke lelaki ba enam penuduk parlimen ungkup PRS ari BN.

    Kelimpah ari Selangau, Lubok Antu enggau Kanowit, penuduk ke bukai iya nya Julau, Sri Aman enggau Ulu Rajang.

    Doris ke mega Sekretari Politik Kepala Menteri nyadi siku ari orang ti diperambu deka nyilih Nyalau lalu Rita Insol diperambu nyilih Entulu di Selangau.

    Rita iya nya Mandal Presiden Serakup Penanam Sawit Dayak (Doppa) sereta nyadi kaban Serakup Indu Dayak Sarawak (SIDS) Bintulu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: