Palan belajar,ngajar kondusif disediaka. - Berita Iban Online

Header Ads

  • Baru Nyadi

    Palan belajar,ngajar kondusif disediaka.

    SERIAN: Gerempung Apai Indai enggau Pengajar (PIBG) sereta Kaunsil Pengatur Sekula SJK (C) Tapah chakah deka nyendiaka kandang endur belajar enggau ngajar ti kondusif ngagai nembiak, nengah projek ngaga sebuah blok bilik kelas baru empat ringkat sekula nya.

    YDP PIBG SJK(C) Tapah, Chong Kuet Fah madahka nya dikena nganti dua blok begunan lama ke digaga pun taun 60an udah tuai sereta buruk kelimpah ari blok nya ti enda ulih nangkup pemayuh nembiak ba sekula nya diatu.

    Ketegal inisiatif enggau peminta raban bansa ba kandang endur tu ku Chong, PIBG enggau Kaunsil Pengatur Sekula, kenyau dua taun ke udah nengah komiti ke ditumbuhka merambu deka nganti blok nya.

    Nitih ku iya penyampau semua ungkus belanja dikena bejalaika projek ti dibagi ngagai dua renggat iya nya urung RM3 juta.


    “Naka ke diatu, komiti udah mujur ngumpul duit ngaga begunan sepenyampau RM1.3 juta ti nyengkaum pemeri ari Perintah Sarawak sepenyampau RM500,000 sereta pemeri ari orang ti kala besekula ba SJK (C) Tapah enggau pemeri ari mensia mayuh.

    “Projek tu dibagi ngagai dua renggat iya nya renggat keterubah sebuah begunan baru empat ringkat sereta bisi 26 bilik kelas deka digaga enggau ungkus belanja dipelabaka urung RM2 juta.

    “Lalu renggat kedua projek tu, sebuah padang endur belanda, gelanggang bola keranjang enggau pagar sekula deka digaga enggau perambu belanja sepenyampau RM1 juta,” ku iya.

    Chong mansutka pekara nya dalam jaku pengelalu pengerami nasih tanah projek ngaga sebuah blok bilik kelas baru empat ringkat SJK(C) Tapah, ba sekula ditu, kemari.

    SJK (C) Tapah ti urung 38 kilometer ari mengeri Kuching, ditumbuhka dalam taun 1942 ke alai diatu udah manggai 75 taun. Diatu sekula nya bisi 29 iku pengajar enggau 398 iku nembiak ti nyengkaum tebal agi anak bansa Bumiputera.

    Pengawa nasih tanah projek nya kemari udah mujur dipenyadika Menteri Pelajar, Sains enggau Pansik Teknologi Dato Sri Michael Manyin Jawong, ke nganti Kepala Menteri Datuk Patinggi Abang Johari Tun Openg.

    SJK(C) Tapah iya nya sebuah sekula ti amat besejarah. Sekula nya ditumbuhka dalam taun 1942 enggau nama asal iya nya Sekolah Rendah Chung Hua Batu 24, ba Batu 24, Jalan Kuching-Serian Lama.

    Ba taun 1966, sekula nya dipindah ngagai Kpg Tapah sereta ditukar nama ngagai SJK Tapah. Reti iya SJK Tapah udah bepalan ba Kpg Tapah pengelama 51 taun.

    Sama bisi datai ngagai pengerami nya kemari Menteri Muda Pemansang Tanah Adat ti mega ADUN Tarat Datuk Roland Sagah enggau pemesai ke bukai kelimpah ari apai indai enggau nembiak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads