Palan mansik mulung antarabansa endang patut ditumbuh: Uggah. - Berita Iban Online

Header Ads

  • Baru Nyadi

    Palan mansik mulung antarabansa endang patut ditumbuh: Uggah.

    TEPA: (Kiba) Rektor UiTM Sarawak Prof. Datuk Dr Jamil Hamali nyuaka tepa ngagai Uggah, ti udah bejadika Simposium Sagu Antarabansa Ke-13, kemari.

    KUCHING: Sapit Kepala Menteri Datuk Amar Douglas Uggah Embas besemaya deka ngenataika langgur penemu numbuhka palan pemansik mulung antarabansa ngagai Kepala Menteri, Datuk Patinggi Abang Johari Tun Openg.

    Iya bepenemu pengawa pemansik bekaul enggau pemansang mulung berengkah ari nanam endang patut chakah dipejalaika berindik ari industri nya bisi peluang dikemansangka sereta nyungkak ekonomi menua enggau orang bekebun mit mulung.

    “Aku nyukung penuh langgur penemu tadi asil resolusyen simposium ti meri penemu bisi pematut numbuhka palan pemansik antarabansa bekaul enggau mulung.

    “Aku deka mai pekara tu ngagai YAB Kepala Menteri Datuk Patinggi Abang Johari Tun Openg, laban enti nuan (media) mendingka keretas kereja ti dipejuraika tadi, potensial (mulung) tu amat besai.

    “Nya alai aku ngasaika industri mulung tu ukai industri ‘sunset’,” ku iya lebuh dikerandau raban pengarang berita ba Simposium Mulung Antarabansa Ke-13 kemari.

    Dulu ari nya Uggah ngarika Abang Johari bejadika Simposium Mulung Antarabansa Ke-13 ke diatur Universiti Teknologi MARA (UiTM) Sarawak ba sebuah hotel ditu.

    Uggah ti enda setuju enggau penemu ti ngumbai industri mulung nya industri ‘sunset’, iya madahka perintah nengeri taun tu bisi ngungkupka belanja sepenyampau RM10 juta ungkup subsidi ngagai pengemeran mulung ngena chara mit.

    Perintah besai mega bisi ngungkupka belanja sepenyampau RM10 juta dikena ngemansangka industri mulung, ku iya

    Nitihku iya dipelabaka di serata nengeri tu urung 1.6 juta iya nya tanah kerapa ti semina ulih endur nanam bansa utai tanam ke ulih idup ba tanah nya nyengkaum mulung.

    Kelimpah ari nya Uggah madahka industri mulung ulih chakah dikemansangka ngena chara nambahka pemayuh produk mulung kelimpah ari tebaloi enggau ke bukai nyengkaum ngaga leka marik ari mulung.

    “Au, kitai patut ngemayuhka produk tu. Nya kebuah UiTM bejalaika pengawa pemansik.

    “Aku arap bendar pengawa pemansik bekaul enggau mulung tu mujur, dikena nentuka mulung nya nadai dibasau mimit nyengkaum daun sereta repu mulung,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads