Pekebun lada dilalau ngemayuhka produk ari asil lada - Berita Iban Online

Header Ads

  • Baru Nyadi

    Pekebun lada dilalau ngemayuhka produk ari asil lada

    BEJADI: Salang dikemata Ding (tengah) enggau Sofhi mubuhka lada ba pemantis lada ngelai bejadi Pesta Lada di Julau, kilah ensana.

    JULAU: Orang bekebun lada dilalau berunding ngambika ngiga chara dikena ngaga produk bukai ari asil buah lada sida kelimpah ngubah chara nanam lada ngena chara organik.

    Kaban Parlimen (MP) Julau Datuk Joseph Salang Gandum madah, ubah nya tau bendar nambahka agi penguntung sida enti dibida enggau chara baka ke dikemeran diatu.

    “Kitai anang enggai nguji pekara baru dikena besemekih enggau orang menua bukai ke bela betanamka lada ngambika lada kitai mengkang kompetitif ba makit dunya,” pia ku iya madah maya bejadi Pesta Lada Julau ditu, kilah ensana.

    Nambahka jaku iya, ku Salang, orang bekebun lada tau minta penemu ari Opis Lada Malaysia sentang produk bukai ke tau digaga ari lada.

    “Kelimpah ari nya anang enggai ngulu nama-nama program tauka seminar ke diatur bekaul enggau lada dikena nambahka penemu kita,” ku iya madah.

    Ambika banding ku iya, lada tau digagaka nyadi lada peram, nyadi minyak lada enggau lada organik.
    Beambika chunto di menua Itali, iya madah, lada peram ba menua nya dijual di makit enggau rega RM800 sekilogram/sebungkus.

    “Kitai ulih ngaga produk ari lada baka enggi sida nya.

    “Nambahka nya, tikas pemanah lada menua kitai jauh manah ari menua bukai lalu tu deka meri pengelebih ngagai produk ari lada menua kitai laku ba makit dagang antarabansa,” pia ku iya madah.
    Tang ku Salang, enti deka ngaga produk baru baka nya, pekara bukai baka chara mungkus ke betul, penyampau pemerat lada nitihka rega enggau ngiga awak dijual ba makit antarabansa meseti patut dirunding.

    Bekenangka rega lada diatu enda entap, ku iya, pekara nya bepun ari peminta makit dunya lalu ukai bepanggai ba perintah.

    “Nya alai, kitai ngarapka orang bekebun lada besabar dulu napi rega lada ke enda berega diatu.

    “Menua kitai ngeluarka asil lada lebih 20,000 tan lada setaun lebih ari 160,000 tan lada menua Vietnam.

    “Nyangka udah tu, industri lada ditu tau berundingka chara bukai ti bela tau mai penguntung ngagai orang betanam lada baka ngaga kebun lada alai temuai menua bukai nemuai kelimpah tau digagaka ‘homestay’ ba kebun lada,” pia ku penemu iya.

    Berebak enggau tu Salang madahka diri berasai gaga meda pengerami Pesta Lada diatu udah nyadi sebengkah pengerami ke besai ba pelilih nya.

    Ketegal nya iya meri terima kasih ngagai Kaban Kunsil Nengeri (ADUN) Meluan Rolland Duat Jubin sereta komiti pengerami bukai ti betuaika Pemesai Pelilih Menua Sofhi Jebal ti udah bebendar ngemujurka pengerami nya.

    Sama bela datai maya pengeramu tu iya nya ADUN Meradong Datuk Ding Kuong Hiing, Residen Sarikei Mohd Junaidi Mohiden enggau Ketuai Polis Julau DSP Bidol Noyeng. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads