Header Ads

  • Berita Tebaru

    Pemansang infrastruktur menua pesisir begunaka bajet ti besai

    Mohd Chee Kadir
    MIRI: Agih belanja dikena ngemansangka infrastruktur di menua pesisir Sarawak nengah Bajet 2018 agi bedau chukup kelebih dikena nangkup peminta perengka guna peranak menua ulu.

    Taja pia ku Kaban Kunsil Nengeri (ADUN) Kabong Mohd Chee Kadir, kandang menua ulu agi tinggal ari sukut perengka guna pemun baka bekal ai enggau kuasa karan.

    “Agi tubah kandang menua ulu patut diperati sereta bedau nerima sambung bekal ai enggau kuasa karan, ambika chunto di Kabong, iya nya penanggul bekal ai enda deras,” ku iya ditu, kemari.

    Berindik ari nya ku iya, agih belanja ti dibantai dalam Bajet 2018 ungkup infrastruktur di menua pesisir Sarawak patut diberi pemerat ungkup kandang menua ti apin bisi perengka guna pemun.

    “Kitai nyambut manah agih belanja urung RM1.4 billion ungkup Sabah enggau Sarawak dikena ngemansangka infrastruktur di menua pesisir lalu ngarapka nya dikena memanah pulaika pemaik rayat,” ku iya nyemetak.

    Agih belanja RM1.4 billion nya nyengkaum RM500 juta dikena ngaga jalai di menua ulu, RM620 juta ungkup kuasa karan lalu RM300 juta ungkup bekal ai.

    Nitih ku iya, peranak di menua Kabong suah betapi enggau penanggul bekal ai enda deras lalu penanggul tu ngujungka peranak seruran nimbun ai dikena nyeliahka suntuk bekal ai.

    “Suah mega ai semina bisi muakka malam aja lalu peranak nimbun ai ungkup guna besehari sehari, kitai andal amat Bajet 2018 tu dikena mantu mutarka penanggul rayat,” ku iya nerang.

    Berebak enggau nya, iya mega ngasapka paip ti udah lama di kandang menua Kabong ditukar tauka diganti baru lalu mutarka penanggul ba peneras ai.

    Ba lansa ke sama, agi bisi rayat di kandang menua nya mega nadai nerima kuasa karan sereta agi bepanggai ba injin api.

    Pekara tu ku iya ngujungka peranak ditating belanja ti besai bebelika diesel dikena ngulihka bekal kuasa karan.

    “Aku ngarapka agih belanja dalam Bajet 2018 meri pemerat ngagai peminta pemun rayat sereta diatur enggau manah enggau efektif,” ku iya.

    Mohd Chee mega meri terima kasihka agih belanja RM1 biliun dikena ngemanahka sekula lama di Sarawak ti tebal agi di menua ulu nyengkaum dua buah sekula di sitak iya.

    “Kitai berasai gaga dua buah sekula di sitak aku bela nerima pemaik ari Bajet 2018 sereta projek tu deka dipejalai kunteriktor ti bisi penau ke mega ngaul diri dalam projek Pan Borneo,” katanya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: