Pemujur ba pelajar ulih mai mayuh ubah enggau pemansang. - Berita Iban Online

Header Ads

  • Baru Nyadi

    Pemujur ba pelajar ulih mai mayuh ubah enggau pemansang.

    SARIKEI: Residen Bagi Menua Sarikei, Mohamad Junaidi Mohidin nyemetak madah semina nengah pemujur ba pelajar aja ulih mai mayuh ubah enggau pemansang ti manah ari semua pekara ngagai rebak baru, kelebih agi bala nembiak sekula kemaya hari.

    Ku iya, perintah udah nyediaka bemacham pengawa dikena ngenegapka agi prestasi enggau penyulut ba pelajar ungkup raban nembiak kemaya hari,ngena bemacham chara.

    “Empas ti menyana polisi pelajar menua nyadi pugu besai ba pejalai pemansang modal mensia enggau pemansang ke bukai ba sesebuah menua.

    “Kemaya hari tu, pelajar nyadi pun pekara ti ulih ngemai orang ngagai penyulut nyema iya dikereja enggau pemintar runding sereta nerima sukung tegap ari semua piak.

    “Ba lansa ke sama mega, penyulut bala nembiak nyadi juluk besai manifestasi pengajar ari pengawa pelajar ti tau nempa modal mensia ti kompeten enggau regas ba pekara penemu enggau pengelandik, inovatif enggau kreatif sereta ulah ti menyana,” ku Mohamad nyemetak.

    Iya mansutka jaku nya rambau Pengawa Nyuaka Setipikit enggau Perais Penyulut Akademik Sekula Sekondari (SMK) St. Anthony Sarikei, kemari.

    Pengawa nya udah diatur di Balai SMK St. Anthony Sarikei.

    Nitih ku Mohamad, pelajar nyadi peransang ti diguna dikena meransang rebak baru besemekih dalam dunya globalisasi ti majak mar ba semua pekara.

    “Pengajar megai pangku pengawa beguna endar nyungkak prestasi enggau penyapai bala nembiak sereta sekula nya.

    “Berindik ari nya, kitai ngarapka bala pengajar ulih ngena daya kreatif enggau inovatif sida kelebih agi ba pengawa nempa mayuh agi modal mensia ti menyana taun baru,” ku Mohamad nampung.

    Ba lansa ke bukai, Prinsipal SMK St Anthony, Vincent Liong Shou Chuan dalam jaku pengelalu iya madah, pengawa nyuaka anugerah ti diberi ngagai nembiak ti nyulut dalam bidang ti diambi sida sekalika akademik tauka kokurikulum iya nya tuju iya meransang nembiak ngambika terus mansang ke mua, nuju penyulut.

    Ku iya, pengawa meri anugerah nya mega nyadi kelai ngenang semua pemanah pengawa semua piak ngemegahka ati, baka diayanka sepemanjai taun di sekula.

    “Nengah peransang semangat ke bansa nya mega, kitai ngarapka raban nembiak ulih ngayanka penyulut ti ngemegahka ati, ti tau ditunda, nyadi ikon enggau chunto ngagai bala nembiak ke bukai, ngambika terus besemekih enggau pangan diri nyapai penyulut dudi hari.

    “Pengawa pelajar tu pejalai ti seruran bisi ungkup semua orang lalu ngagai sida ti nembiak, pelajar ti betul muka peluang ngerandang jalai nyapai juluk ti dikeingin sida jemah,” ku Liong nampung.

    Sama bisi datai Chairman Komiti Pengatur Pengawa Sekula, Rev. Fr. James Siong Hung. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads