Pemutus Masing bagi chalun PRU14 Lubok Antu dipebasa: Nyalau. - Berita Iban Online

Header Ads

  • Baru Nyadi

    Pemutus Masing bagi chalun PRU14 Lubok Antu dipebasa: Nyalau.

    KUCHING: Kaban Parlimen (MP) Lubok Antu, Datuk William Nyalau Badak nyerah pemutus iya dipilih baru nyadi chalun sitak nya maya Pengawa Bepilih Besai ke-14 (PRU14) tu ila ngagai bala ketuai pemesai Barisan Nasional (BN).

    Nyalau ba penggal kedua iya nyadi MP Lubok Antu mansutka pekara nya nimbal jaku Presiden Parti Rakyat Sarawak (PRS) ti mega nyadi Sapit Kepala Menteri, Tan Sri Datuk Amar James Jemut Masing, madahka nama iya (Nyalau) entara dua iti nama pemesai PRS ke nadai di sengkaum dalam lis nama chalun PRU14 ke udah di anjung ngagai Chairman ti mega Kepala Menteri Datuk Patinggi Abang Johari Tun Openg enggau Presiden BN ke mega Menteri Besai Datuk Seri Najib Tun Razak.

    "Enti iya (Masing) enda nyengkaum nama aku, enda ngawa! Iya 'boss' besai kami," ku Nyalau madah lebuh dirandau Utusan Borneo ditu, pagi tadi.

    Iya nandu baru madahka Masing empu nadai madah ngagai iya pasal nama iya enda di sengkaum dalam lis chalun PRU14, tang semina macha ari surat berita aja, ku iya.

    Taja pia, iya madah pilih nya agi mayuh bepanggai ba pilih mensia mayuh, nyengkaum ari Menteri Besai enggau Kepala Menteri ke seruran betatika chalun ke ulih menang (winnable candidate).

    Lebuh ditanya baru nyangka kebuah nama iya enda disengkaum, ketegal pengerai iya, 65, asal ari Lubok Antu empu madahka pengerai nya ukai penanggul.

    "Aku orang ke bepengerai," ku iya.

    Bekait enggau nama chalun ke PRU14, ke enda tau enda ditetapka (endorse) ulih Kaban Kunsil Nengeri (ADUN) di sitak parlimen nya, iya madah nya utai ke baru.

    "Suba nadai utai bansa tu, enda tau enda di tetapka ulih ADUN, lalu nyadi pemerat.

    "Aku enda madah nya salah tang aku nadai di padah. Bedau lama tu tadi ba siti atur pengawa Hari Peladang, Malcolm bisi begulai enggau tang iya nadai madah nama-nama ngagai aku," ku iya.

    Semina iya alit ati ku iya, laban sekeda chalun PRU 14 enda ibuh ditetapkan ulih ADUN.

    "Malcolm, kaban aku, lalu aku mayuh udah mantu iya bekimpin maya bepilih besai nengeri (PRN).

    "Naka kediatu, aku enda kala enda betemu enggau rayat sereta ngaga pengawa aku nyadi wakil rayat. Tan Sri (Masing) empu madahka pengawa aku manah.

    "Naka kediatu, sukung aku ari rayat di Lubok Antu agi tegut," ku iya.

    Nya alai ku iya, barang ku tuai pemesai parti deka ngeletakka barang atur milih chalun PRU 14.

    "Aku enda madah nya salah, aku bebasaka pemutus digaga parti," ku iya.

    Rintai sejarah politik Nyalau ba pemungkal iya masuk politik, iya bediri nyadi chalun ngatika diri (Bebas) betangkup enggau chalun BN (maya nya), Jawah Gerang, alai BN menang enggau majoriti dua ribu lebih.

    Nangkan nya, Nyalau masuk nyadi kaban PRS, lalu maya PRU ke-12 (2008), iya bediri atas tikit BN-PRS betangkup sereta ngalahka chalun SNAP, Nicholas Bawin.

    Lalu nangkan nya, PRU13 (2011), Nyalau sekali agi mujur ngetanka kerusi BN-PRS lebuh betangkup tiga penjuru, ngelaban Larry Sng (ari SWP) enggau Nicholas Bawin (ari PKR), lalu teulihka majoriti, 4,091 undi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads