Pengawa beripai pelasar ngempung peranak genturung pendiau: Dennis. - Berita Iban Online

Header Ads

  • Baru Nyadi

    Pengawa beripai pelasar ngempung peranak genturung pendiau: Dennis.

    UNGKUP PENGELIKUN: Victoria (kiba) nyuaka perengka pengerara api ngagai Ketuai Raban Bansa, Usong Ding seraya dikemata Dennis (empat kiba) enggau Anyi (enam kiba).

    MARUDI: Pengawa beripai ke ngaul bemacham renggat umur peranak di sesebuah genturung pendiau enggau rumah panjai nyadi siti pelasar pemadu manah ngempung peranak seraya nambahka kerejasama enggau penegut kaul entara sida.

    Pia mega ku Kaban Kunsil Nengeri (ADUN) Telang Usan, Dennis Ngau, pengawa ke bansa nya diatur nitihka pengiruh enggau niat ngadaka kandang genturung pendiau sida beresi sereta manah dipeda, nengah pengeransing diri empu.

    “Nya alai aku andal amat komuniti di Long Bemang enggau peranak rumah panjai ke bukai di Ulu Baram enggau Telang Usan, bisi runding deka seruran kiruh sereta begulai gawa.

    “Tu ulih dipeda nengah pemujur kitai enggau penyapai ngasuh peranak ari Telang Usan ‘tampak rita’ enggau penyelai sida empu sereta penyerakup sida ba mayuh bengkah pekara,” ku Dennis nampung.

    Iya mansutka jaku nya rambau bejadika Pengawa Beripai Besai ti diatur di Long Bemang, semak ditu, bedau lama tu tadi.

    Iya optimis endar nengah aktiviti volunteer ti diatur ke bansa nya enggau suah agi tau nyadi pelasar enggau kereban ngenegapka agi penyerakup komuniti kelebih agi peranak di Long Bemang enggau Baram.

    Tang enti kurang atur aktiviti ke bansa nya ku iya, deka ngayanka nadai pemansang enggau enda maju.

    “Anang nulak asil ti manah ari kereja ngaul komuniti nengah pengawa ke bansa tu, laban iya meri kitai peluang ulih gawaka komuniti di genturung pendiau kitai empu,” ku iya nandu.

    “Pemaik ukai ungkup siku aja, tang tau meri akses ngagai orang bukai dalam komuniti ngambika ulih bekerejasama sereta besaup enggau bebasaka pangan diri.

    “Aku dekaka peranak Long Bemang seruran maju enggau idup beserakup dalam rumah panjai sida, ditambah enggau pengawa sereta pengiruh ngaul diri ba pengawa ti ngemai reti chukup besai baka tu endang patut ditunda semua rumah panjai di Telang Usan,” ku iya.

    Dennis ngingatka semua orang ngambika seruran meda peluang ba pengawa ngemansang diri enggau rumah panjai sida empu seraya begulai ngemansang enggau ngemujurka iya dalam siti tim.

    Berebak enggau pengawa sehari nya, Dennis begulai enggau Kaban Parlimen (MP) Baram, Anyi Ngau, bisi ngemendarka agih belanja penyampau RM400,000 dikena ngaga Balai Mayuh Guna Long Bemang nengah Projek Transformasyen Menua Pesisir (RTP) Telang Usan.

    Sama bisi datai Pemesai Gawa Norhidayah Husbullah, Penguasa Opis Bomba enggau Penyah Penusah Zon 6 Miri Supt Law Poh Kiong, Ketuai Opis Bomba enggau Penyah Penusah Marudi Maureen Sim, Eksekutif Sokongan Operasi SSGP Petronas, Victoria Winsome Southwell sereta bala pengari ari Universiti Curtin Miri. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads