Header Ads

  • Berita Tebaru

    Pengawa manah udah dikereja Jabu dikeingat belama

    ex-Sapit Kepala Menteri Datuk Patinggi Tan Sri Alfred Jabu Numpang 
    Iya udah nempa raban ketuai rebak baru ti udah mai pemansang sereta ngangkatka ekonomi peranak Sarawak.

    KUCHING: Pengawa manah ke udah dikereja ex-Sapit Kepala Menteri Datuk Patinggi Tan Sri Alfred Jabu Numpang ti nempa raban ketuai rebak baru ti udah mai pemansang enggau ngangkatka ekonomi peranak Sarawak seruran dikeingat.

    Kepala Menteri Datuk Patinggi Abang Johari Tun Openg madah nengah embing Jabu sereta ex-Kepala Menteri ke diatu Tuai Megai Menua (TYT) Tun Pehin Sri Abdul Taib Mahmud udah nempa raban ketuai rebak baru renggat nengeri kelebih agi dalam Parti Pesaka Bumiputera Bersatu (PBB).

    “Berindik enggau nya, PBB deka meri jaku puji ngagai Jabu enggau Tun ketegal udah mujur nempa raban ketuai rebak baru ke bekualiti dalam PBB.

    “Nuan (Jabu enggau Tun) udah ngereja pengawa manah ngagai komuniti kelebih agi peranak Sarawak ba atur pemansang di nengeri tu,” ku iya.

    Iya mansutka jaku nya ba Pengerami Ngintu Hari Pengada Jabu ke-77 ke bela digulu Tun Taib sereta Toh Puan Datuk Patinggi Ragad Kurdi Taib di Hotel Imperial ditu, malam ensnaus.

    Abang Johari nambah, nengah bantu raban ketuai rebak baru nya, program ngemansang rayat deka diadu enggau chakah ngambi ulih nentuka juluk ‘Wawasan 2030’ dijapai.

    “Ketegal nya aku enggau raban ketuai bukai ngenuku chara baru iya nya ekonomi digital ti deka nentuka Sarawak nyadi nengeri pemadu mansang di Malaysia,” ku iya.

    Ba pengerami ke sama, Jabu ba jaku iya madah meri sukung ngagai ketuai menteri ke baru sereta kabinet iya lalu pechaya ulih ngembing Sarawak nuju pemansang.

    “Aku deka ngenataika sukung ngagai Kepala Menteri(Abang Johari) kelebih agi ba atur ngenanka hak rayat Sarawak ke disetuju ba Semepakat malaysia 1963.

    “Anang takut, nya sigi hak kitai, rayat deka seruran nyukung,” ku Jabu.

    Bela datai (Ex) TYT Tun Mohammad Salahuddin enggau Toh Puan Norkiah, Sapit Kepala Menteri Datuk Amar Douglas Uggah Embas sereta bini Datin Amar Doreen Mayang, Sapit Kepala Menteri Datuk Amar Awang Tengah Ali Hasan sereta bini Datin Amar Datuk Morliah Awang Daud enggau menteri ke bukai. #UtusanBorneo

    No comments

    Post Top Ad