Pengelikun peranak semanjai SSGP seruran deka diintu manah, ku Suffian. - Berita Iban Online

Header Ads

  • Baru Nyadi

    Pengelikun peranak semanjai SSGP seruran deka diintu manah, ku Suffian.

    PERENGKA PENGRARA API: Suffian (mua, lima kiba) nyuaka perengka pengerara api ngagai Meran Surang seraya dikemats bala bukai.

    MIRI: Paip Gis Petronas Sabah Sarawak (SSGP) netapka diri deka nentuka pengelikun genturung pendiau enggau sekula ti bisi di semanjai paip nya ari Tinjar nyentuk ke Apoh Tutoh di Baram dijaga memanah.

    Ketuai unit operasyen, Suffian Sabeli madahka SSGP nadai kala enda ngaul komuniti menua pesisir.

    “SSGP deka bejalaika semua pengawa ngabas sereta pulai baru ngagai kandang menua di semanjai sambung paip kami, ngena awak enggau peranak dia sereta nyadi sebagi ari aktiviti sida, sechara betimpuh sekali dalam kandang tiga bulan ninting taun.

    “Tetiap kali ngabas, kami mega deka mai raban ejensi penerit adat nyengkaum Polis DiRaja Malaysia (PDRM) enggau Opis Pengerara Api enggau Penyah Penusah (Bomba),” ku Suffian madah ngagai The Borneo Post bedau lama udah.

    Bedau lama, sida udah ngagai kandang menua ulu di Baram berengkah ari 18 ngagai 20 September.
    Mayuh aktiviti udah dipejalai maya nya dikena ngisi awak nya memanah dia.

    Ba hari keterubah, raban sida bisi ngatur licha enggau mandangka pengawa nyaga pengelikun di dapur ngagai peranak Rumah Meran Surang di Lapok.

    “Kami mega bisi nyuaka perengka pengerara api ngagai ketuai genturung pendiau ngambika dikena peranak rumah panjai nya, sereta mantu sida ngintu enam unit perengka pengerara api ti udah mati timpuh,” ku Suffian.

    Sida sebuat mungkal pejalai ke Sekula Primari (SK) Long Kevok ba hari kedua.

    “Tim kami bejalaika pengawa meresa kededua rumah endur bemalam lelaki enggau indu senentang kereban pengelikun sereta nyendiaka pelin penusah ngenyit ngagai sida ke diau dia enggaika bisi sebarang penusah ngenyit enggau enda disadang nyadi.

    “Licha pasal pengelikun di sekula enggau genturung pendiau udah diatur ungkup peranak dia. PDRM mega bisi meri licha senentang penyalah gian dadah ngagai bala nembiak enggau peranak ke bukai,” ku Suffian.

    Pengudah SK Long Kevok, sida nampung pejalai ngagai Long Kevok, Long Leng enggau Long Latei.

    Ba hari ke penudi, sida ngagai SK Long Bedian, ke alai pemesai Bomba meresa perengka dikena nyaga pengelikun ari penusah angus ba rumah bemalam lelaki enggau indu pasal seraya PDRM meri licha pasal salah guna dadah.

    “Kami mega bisi ngabas Rumah Johanes Sang di Jematan Teru sereta bejalaika kimpin nyaga pengelikun ari penusah angus, sereta mega ngatur licha enggau mandangka chara ngena perengka pengerara api enggau pengelikun di dapur.

    “Perengka pengerara api udah disua ngagai Tuai Rumah Johanes Sang,” ku iya nambah.

    Kaban SSGP ke bisi enggau ba pejalai pengelama tiga hari berunggu nya nyengkaum Eksekutif Unit Sukung Operasyen, John Fery Jame, Walter Anyie Tomy enggau Victoria Winsome Southwell, diketuaika Suffian.

    Bela bisi enggau pemesai Bomba Zon 6 Pemantu Superintenden Maureen Sim enggau Senior Opis Bomba Nasir Razali,PDRM Marudi diarika Pemantu Superintenden Polis (ASP) Cliff Emang Ngau enggau Inspektor Cheng Fook Min. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads