Pengerami ‘Oktoberfest’ nadai penanggul disambut ba Sarawak - Berita Iban Online

Header Ads

  • Baru Nyadi

    Pengerami ‘Oktoberfest’ nadai penanggul disambut ba Sarawak

    KUCHING: Menua Sarawak chunto ke pengabis manah di serata menua Malaysia, alai penyerakup tiap pupu raban bansa nyadi pemerat sosio-ekonomi menua tu.

    Kepala Menteri Datuk Patinggi Abang Johari Tun Openg madah, di dalam menua Sarawak, pupu raban bansa bebasaka pangan diri enda ngira bansa, pengarap tauka adat pesaka orang nya.

    “Menua kitai enda belaya enggau pangan diri enti dibanding enggau sitak menua bukai, aku ngarapka kita nemu sitak menua ni ku aku, sitak menua bukai di Malaysia tu beranu ke pangan diri.

    “Siku nganu siku, siku madahka siku tu enda manah….Sigi nadai pengawa bukai dalam laman media rama….Udah nya mai orang mechahka butul beer, ketegal orang bukai ke deka berami nyambut pengerami Oktoberfest.

    “Kitai di Sarawak enda bansa nya, laban Sarawak ngembuan mayuh macham pupu raban bansa, kitai bebasaka pangan diri, bebasaka pengarap pangan diri. Sida ke sepiak nyin, bepechahka butul Beer, kitai enda ngemendarka adat bansa nya datai ke Sarawak,” ku iya.

    Iya madah munyi nya lebuh bejaku ba ngepunka atur pengawa ‘Lun Bawang Cultural Showcase Dinner’ di sebengkah hotel ditu,kemari sereta di gulu ulih urung 3,000 lebih mensia mayuh ari bemacham pupu raban bansa ngagai pengawa makai lemai nya.

    Nya kebuah ku iya, Sarawak bejalaika kuasa iya dalam imigresen laban adat bansa nya (ngelaya orang, enda bebasaka orang) ‘alien’ ari adat kitai.

    “Rayat kitai orang ke manah magang, enda belaya enggau pangan diri,” ku iya.

    Abang Johari ti mega nyadi Menteri Pemansang Nengeri enggau Pengeraja Asal madah nyerumba pengerami ‘Oktoberfest’ siti pengerami orang bebansa Jerman, ku iya, nadai napi penanggul di Sarawak.

    “Maya aku agi nyadi Menteri Dagang Temuai, Oktoberfest nya adat orang Jerman, sida (orang Jerman) deka mai adat sida iya kitu (Sarawak), barang ku sida iya. Sapa ke deka ngirup, barang ku sida iya, asal enda ngenyaika nama menua tu.

    “Tu….’orang ari sepiak nyin’ belaya pasal Oktoberfest, udah nya bepechahka butul Beer, baka ke dipandang sida iya ba laman media rama. Kitai (di Sarawak) enda bansa ya, nya ukai adat kitai,” ku iya ke ngelalau rayat menua tu majakka pengawa sida iya nyaga sereta ngintu adat pesaka sida iya.

    Ba lansa bukai, Abang Johari ti mega nyadi presiden Parti Pesaka Bumiputera Bersatu (PBB) Sarawak, madahka PBB enda ngemendarka UMNO masuk ngagai Sarawak.

    “Parti ke penatai iya asal ari Semenanjung, UMNO sigi enda dikemendarka masuk ngagai Sarawak. Kita anang irau pasal UMNO,” ku iya.

    Sama bisi ngulu pengawa makai lemai nya, Sapit Kepala Menteri ti mega nyadi Menteri Industri enggau Pemansang Orang Dagang, Datuk Amar Awang Tengah Ali Hasan enggau bini iya, Datin Amar Dayang Morliah Awang Daud, Sapit Menteri Opis Pengawa Dagang Dalam Menua, Koperasi enggau Pekara Bebeli Barang Datuk Henry Sum Agung, Menteri Muda di Opis Kepala Menteri (Corporate Affairs) Abdullah Saidol, ADUN Batu Danau Paulus Palu Gumbang, ADUN Ba’kelalan Baru Bian, enggau presiden Gerempung Lun Bawang Menua, Ipoi Datan. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads