Penyakal anang ngansak Riot ngambi kemisi. - Berita Iban Online

Header Ads

  • Baru Nyadi

    Penyakal anang ngansak Riot ngambi kemisi.

    Iya udah meri kerejasama manah ba tasat SPRM lalu tejuka SPRM bejalaika pengawa mansik pekara nya.

    KUCHING: Sapit Presiden Parti Sa’ati Rakyat Sarawak (SUPP) Dato Sri Richard Riot enda diasuh ngambi kemisi tajapan iya dipinta meri penerang ngagai Opis Ngemunas Penyalah Makai Suap (SPRM).

    Presiden SUPP Datuk Dr Sim Kui Hian madah ba penau parti maya ke diatu, Riot ke mega Menteri Pengatur Pengereja Pengawa udah meri kerejasama manah ba tasat SPRM sentang salah guna agih belanja ke nyadi ba dalam opis menteri iya.

    Iya madah bisi berandau enggau Riot kena malam Hari Lima tu tadi pengudah Riot mantu tasat SPRM pengelama 10 jam ba Indu Opis MACC di Putra Jaya.

    “SPRM benung bejalaika pansik. Enti ditemu salah, kitai sigi deka neritka ukum.

    “Tang enti enda, aku engka sengapa neritka ukum (enti ukum nya diterit diatu),”ku iya madah ngagai pengarang berita pengudah nyuaka geran ngagai 42 bengkah gerempung di Indu Opis SUPP ditu, kemari.

    Dr Sim ke mega Menteri Opis Kunsil Kandang Menua enggau Pengawa Berumah mansutka jaku nya nimbal pinta penyakal ti dekaka Riot ngambi kemisi pengudah ke bisi ditasat SPRM.

    Ku Dr Sim, parti penyakal empu enda ngasuh kaban dalam parti ngambi kemisi maya ke bisi ditasat opis nya, ke alai iya beambi chunto ke seiku ketuai penyakal di Pulau Pinang ti kala ditasat SPRM dulu agi ari tu.

    “Tu atur ke bechiping. Maya bala sida ditasat tauka didawa ba kort, sida madah pekara nya ketegal pengawa politik lalu enda ngasuh orang ke didawa ngambi kemisi,’ku iya.

    Iya mega nambah sigi bechiping netapka Riot baka ke udah ditemu salah laban kes nya diatu benung dipansik.

    Iya madah parti seruran meri kerejasama manah ngagai SPRM laban parti pechaya pekara nya ulih nyaup ngurangka penyalah makai suap di menua tu.

    “Aku ukai ngachau kereja SPRM. Ke amat, aku meri kerejasama naka pengulih,’ku iya.

    SPRM madah udah ngambi penerang ari Riot kena Hari Lima tu tadi ngambika ulih mantu tasat kes salah guna belanja penyampau RM40 juta ke diagih ungkup Skills Development Fund Corporation.

    Riot, 66, datai ba Indu Opis SPRM di Putra Jaya pukul 10.03 pagi sehari nya, lalu iya dipeda mansutka diri pukul 8.00 malam hari ke sama pengudah meri penerang urung 10 jam.

    MP Serian pengelama enam renggat nya patut bejadi Makai Lemai begempuru baru sekula Sekondari Serian di Kuching kena malam Hari Lima.

    Kena Hari Empat tu tadi, Sekretari Politik Riot-Datuk Peter Runin ke mega kaban SUPP diriman enam hari ngambika ulih mantu tasat ba kes ke sama.

    SPRMkena 13 September udah ngenan empat iku orang ke bisi kaul enggau kes nya ke alai semua sida empat diriman enam hari berengkah 14 September lalu pengudah dilepas nengah jamin SPRM.

    Ketuai SPRM Tan Sri Dzulkifli Ahmad madah opis nya deka mansik penerang Riot enggau sekretari politik iya ngambi ulih mantu tasat kes.

    Iya enda nyangkal pengawa ngangauka Riot baru enti pekara nya diguna ba tasat kes ke sama, nyengkaum ngambi penerang ari raban pemesai bukai opis menteri nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads