Peranak ti diau di Bintulu meseti begulai ngintu kandang menua nya. - Berita Iban Online

Header Ads

  • Baru Nyadi

    Peranak ti diau di Bintulu meseti begulai ngintu kandang menua nya.

    PEMADU PANJAI: Forca Bintulu diakun dalam MBR udah ngaga kek bulan pemadu panjai iya nya 888 meter pemanjai.

    BINTULU: Peranak ari luar Bintulu ti diau sereta gawa ditu patut nyadika kandang menua tu baka palan penatai asal sida empu, pia ku Menteri Bekal Ai enggau Elekterik Menua Pesisir Dato Sri Dr Stephen Rundi Utom.

    “Jadika Bintulu tu baka palan penatai asal kita empu taja kita datai ari luar kandang menua Bintulu, lalu intu sereta bebasaka pekara ke digaga ditu.

    “Tu dikena kitai nyapai juluk nyadika Bintulu ukai semina hub ungkup pengawa industri tang mega menua ti lantang endur diau,” pia ku Kaban Kunsil Nengeri (ADUN) Kemena rambau Festival Tanglung Bintulu 2017 di Naim Bintulu Paragon Street Mall, bedau lama tu tadi.

    Iya ti nyadi temuai dipebasa dikangaubejadi sereta nyadi saksi pengawa mechahka rikod dalam ‘Malaysia Book of Records’ (MBR) ba kek bulan pemadu panjai digaga.

    Lebih 600 iku ari semua serak komuniti ngaul diri ba pengawa ngaga kek bulan ke 888 meter pemanjai ti udah nya ditukuka pemesai MBR Christopher Wong enggau rikod kek bulan pemadu panjai.

    “Kitai deka meda Bintulu mansang ari sukut ekonomi ti tegap sereta kitai mega dekaka Bintulu seruran lantang endur diau.

    “Kitai patut nyaga pengelantang sereta nyaup Gerempung Pemansang Menua Bintulu (BDA) bejalaika program pemansang di Bintulu,” ku Rundi.

    Ku iya nambah, sebarang perambu pemansang meseti dipejalai enggau manah sereta meruan dikena nyeliah sebarang penanggul dudi hari.

    Ku iya nambah Bintulu napi penyekut trafik ke nyadi siti isu besai ti patut diputar enggau lengkas.

    Iya pechaya BDA bisi pelin besai ti nentuka pejalai trafik nadai penanggul di pasar laban pekara tu beguna endar ngembuan pelin ti meruan laban nyema ukai sehari tu nyangka dalam timpuh 10 taun agi peranak di Bintulu deka nambah.

    “Nya alai Kepala Menteri Datuk Patinggi Abang Johari Tun Openg berunding bakani kitai ulih nyungkak tauka nampung pemansang di Bintulu.

    “Nya kebuah kitai deka bisi jematan di Kuala Kemena ngambika jematan nya tau dikena nampung pemansang di Bintulu, ngemesaika pasar Bintulu dataika tanah di seberai sungai,” ku Rundi seraya nambah, enggau pengawa ngemesai nya, pemansang ukai semina bisi dipejalai tengah mengeri aja.

    Berebak enggau nya, iya mega meri pengaga ati ngagai Forca ti udah ngintu genap taun ke-30 iya, BDA enggau ejensi bekaul ke bukai ti udah mujur diakun dalam MBR ti udah ngaga kek bulan pemadu panjai.

    “Batang pengerami nguji ngempung semua kitai begulai dalam siti pengelantang enggau penyerakup.

    “Kitai bisi tiga pengerami dalam siti atur, keterubah ngelancharka pengawa ngintu genap taun Forca ke-30, kedua ngemechahka rikot MBR kek bulan pemadu panjai lalu ketiga, lebih 2,000 pesereta belanda ungkup Sarawak Maju Run dalam nama penyerakup,” ku iya.

    Sama bisi datai Presiden Forca Bintulu Hii Toh Him, Pemesai Pelilih Bintulu Mataip Sayu enggau Menijar Besai BDA Rodziah Morshidi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads