Header Ads

  • Berita Tebaru

    Perintah nengeri deka nyaup opis pelajar

    BEJADI: Abang Johari (kanan) mangkung bell kelai bejadi Simposium Pelajar Jaku English Sarawak(SELES) 2017 di Kuching kemari. Bela dipeda Manyin(tiga kanan).
    Taja pekara pelajar dikuasa Perintah Besai, S’wak ngasai pengawa ke udah diadu nya enda ngasi.

    KUCHING: Perintah Sarawak deka nyaup ba pengawa ngangkatka ikas pengelandik raban nembiak sekula nguasa jaku English.

    Kepala Menteri Datuk Patinggi Abang Johari Tun Openg madah tajapan pekara pelajar dikuasa Perintah Besai, Sarawak ngasai pengawa ke udah diadu nya enda ngasi raban nembiak ditu.

    “Tajapan mayuh insiaitif udah digaga Opis Menteri Pelajar ba atur ngangkatka standard English nembiak sekula, pemereti mensia mayuh kelebih ari bala pengereja pengawa mengkang baruh.

    “Siti penanggul ke ditapi Opis Pelajar Sarawak iya nya ba sentang agih belanja ke diberi suah enda chukup.

    “Tu ketegal rampa menua kitai ti besai ke alai sekeda sekula didirika jauh di menua ulu,”ku iya.

    Abang Johari mansutka jaku nya rambau bejadi Simposium Pelajar Jaku English Sarawak (SELES) 2017 ke diatur di sebengkah hotel ditu, kemari.

    Iya nambah perintah nengeri deka nyaup opis pelajar ba sekeda pengawa ke diasai berat.

    “Kitai ulih nyendia latih ngagai pengajar ngambika landik ba English sereta ngambika sida lebih kreatif enggau inovatif.

    “Kedua, Sarawak ulih nyendia perengka latih enggau belajar lalu kitai deka nyukung aktiviti sekula baka ke pekit belaban bejaku enggau ngarang cherita ba English,”ku iya.

    Ngenang kaul ke sama, Abang Johari madah pengereja pengawa meseti meretika guna landik ba English tajapan sida udah nembuka pengawa sekula.

    Ku iya, atur ngangkatka standard sereta ngelaku English ba raban nembiak aja enda chukup.

    “Enti kitai dekaka siku orang landik ba English, kitai meseti nentuka iya ba endur tauka pengawa ke alai semua bejaku English.

    “Tu mih kebuah Sarawak udah netapka English nyadi seiti agi bahasa rasmi kelimpah ari Bahasa Malaysia,”ku iya.

    SELES 2017 diatur berengkah kemari nyentuk ngagai 25 Oktober 2017 lalu digulu raban pengajar ari selampur Sarawak.

    Bela datai Menteri Pekara Pelajar, Sains enggau Pansik Teknologi Dato Sri michael Manyin, Menteri Muda Pekara Pelajar Dr Annuar Rapaee enggau Sapit Speaker DUN Dato Gerawat Gala. #UtusanBorneo

    No comments

    Post Top Ad