Perintah ngatur pemansang ungkup pemaik rayat. - Berita Iban Online

Header Ads

  • Baru Nyadi

    Perintah ngatur pemansang ungkup pemaik rayat.

    KELAI PENGAWA NYUAKA TINGKI: Rohani (tiga kiba) benung nyuaka replika tingki ngagai siku ari peranak Rumah Wilson seraya dikemata Indit (kiba), Wilson (dua kiba) enggau Jasni (tengah) rambau atur program nya.

    SRI AMAN: Menteri Pemansang Orang Indu, Ruang Bilik enggau Komuniti Malaysia (KPWKM), Datuk Seri Rohani Abdul Karim madah seriris enggau pemansang kemaya hari, perintah seruran bebendar gawa ngemansang enggau mai pengelantang ngagai semua serak komuniti di nengeri tu, kelebih agi peranak di kandang menua pesisir.

    Nitih ku iya, pengawa nya nyata dipeba nengah bemacham program pemansang ti udah, benung lalu deka chakah dipejalaika perintah nengeri pulaika pemaik enggau penyenang rayat.

    Taja pia ku iya, pengawa pemansang perintah deka mar dijapai nyema rayat enda ngena memanah semua peluang enggau perengka guna pemansang ti udah disediaka perintah.

    “Pekara tu tentu deka ngerugika kitai semua lalu tau ngasuh pejalai projek pemansang di nengeri tu tejanggal,” ku iya lebuh bejaku rambau Program Pemesai Begulai Enggau Rayat Parlimen Batang Lupar bepalan di Rumah Wilson Bada, Gran B, Stumbin, Sri Aman, semak ditu, kemari.

    Berindik ari nya, rayat kitai enda ulih diau diri aja sereta semina ngandalka semua bantu enggau subsidi ari perintah aja. Tang kitai patut gawa ngatika diri, bisi inisiatif enggau ngerebut semua peluang ti disedia ungkup kitai baka dalam sektor industri, dagang, teknologi pemadah enggau arus penyambung (ICT), kebun dandang besai, pelajar, dagang temuai, servis enggau ke bukai.

    Ba pekara tu, kitai patut ulih mereti enggau nerima ubah sereta penemu baru enggau ngubah chara kitai bepikir enggau gawa ngambika kitai enda tinggal ari arus pemansang. Tu dikena kitai nyediaka diri ngena penemu pengelandik ti chukup berengkah ari diatu nentuka ulih nyapai juluk menua nyadi menua mansang.

    Ku Rohani nerang, napi jeman globalisasyen empas ICT, pengawa nambahka ‘Komunikasyen Pemansang’ makin beguna enggau pemisi peminta nempa komuniti bepenemu enggau berinformasi tauka K-Society.

    “Nadai alai, kuasa bepikir komuniti enggau penau ngaga inovasyen patut diberi pemerat ngambika sida ulih besemekih enggau napi pemar sosio-ekonomi kemaya hari. Nengah chara tu, kitai ulih meri penyedar, ngubah ulah enggau pikir, meransang komuniti rinduka penemu sereta nerima enggau ngujika penemu ke baru, ngangkatka tikas pemanah pengidup sida.

    “Pengawa ngenataika penerang pasal pemansang tu seruran nyadi agenda besai perintah ti dikenatai nengah opis enggau ejensi pemansang iya. Taja pia, penegap enggau pangka ba pengawa meri penerang deka manah agi nyema iya dikereja begulai sereta ngaul bemacham piak baka bala ketuai raban bansa, piak peribit, piak media enggau serakup volunteer sereta gempung ukai dikausa perintah (NGO),” ku iya silik.

    Sama bisi datai Sapit Ketuai Sekretari KPWKM, Azman Yusuf, Chairman LPPKN, Datuk Mariamas, Ketuai Direktor Opis Pemansang Orang Indu, Datuk Yatimah, Direktor Institut Sosial Malaysia (ISM), Dr. Al-Azmi, Direktor LPPKN Sarawak, Cik Rohaini, Direktor Opis Pengerejista Bansa (JPN) Sarawak, Jasni Jubli, Residen Bagi Menua Sri Aman, Indit Bangai sereta bala bukai.

    Berebak enggau nya Rohani mega bisi ngemendarka agih belanja penyampau RM5,000 ngagai JKKK Rumah Wilson Bada seraya RM 3,000 da agi ngagai Biro Indu dikena bejalaika aktiviti sepanjai taun sida.

    Iya mega bisi nyuaka agih belanja penyampau RM30,000 ngagai Opis Residen Bagi Menua Sri Aman dikena ngatur Pesta Benak Sri Aman ti deka diatur berengkah ari 3 ngagai 5 November tu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads