Perintah randaka modal mensia ti bepengelandik. - Berita Iban Online

Header Ads

  • Baru Nyadi

    Perintah randaka modal mensia ti bepengelandik.

    KENANG: Josipah (tiga kiba) benung nyuaka tepa ngagai Harden (tengah) seraya dikemata bala bukai.

    SRI AMAN: Bidang teknikal, vokasional enggau pengelandik diatu nyadi pemerat perintah dikena nempa mayuh agi raban bepengelandik nyadika chuan menua mansang datai ba taun 2020 ti deka ngadaka modal mensia bepengelandik enggau bepenatai pemisi tinggi.

    Menteri Muda Pengelantang Komuniti Sarawak, Datuk Francis Harden Hollis madah, sedarka pekara pemesai guna modal mensia ti landik dikena nempa menua bansa enggau pengerembai ekonomi tegap seriris enggau juluk transformasyen Malaysia ngagai menua bepenatai pemisi tinggi, perintah udah nyediaka bemacham program latih pengelandik mantu raban tu nyungkak penatai pemisi menua nengah program latih pengelandik perintah.

    “Latih pengelandik menua patut chakah agi dipejalai nyema Malaysia bisi juluk ngadaka modal mensia ti ulih mansang sereta besemekih di renggat dunya,” ku iya rambau pengawa bejadi nutup Kus Pengelandik Quickwin ‘Online Marketing’, Pemanis Mulut enggau Makanan Ringan diatur Opis Pemansang Mensia Mayuh (KEMAS) Bagi Menua Sri Aman bepalan di Dewan Suarah, Sri Aman, semak ditu, pagi kemari.

    Harden ke mega Kaban Kunsil Nengeri (ADUN) Simanggang mega muji pengawa dipejalai KEMAS nyediaka bemacham bidang pengelandik di renggat akar umbi baka bejait enggau nyulam, berapi, kraf jari, ngelagu diri enggau kelas pelajar pengelantang ruang bilik (PKK).

    “Aku muji pengawa KEMAS laban pintar nyediaka kus pengelandik ke baka tu tau meri pemaik ngagai bala komuniti kitai di menua pesisir, kelimpah nambahka penemu ngagai bala nembiak enggau sida indu ke diau di rumah ba pengidup, iya mega ulih nambahka penatai pemisi ruang bilik,” ku iya nerang.

    Ngelansa pasal kus nya, ku Harden, tu kus timpuh pandak ti ulih meri pangka ngagai bala pelatih ngepunka dagang dikena ngulihka belanja.

    “Nengah strategi tu, KEMAS ngatur kus pengelandik pemun tu ulih nyediaka peluang dagang enggau kereja ngagai bala pelatih KEMAS pengudah nembuka latih.

    “Enam bidang pengelandik diberi pemerat iya nya Bejait, Berapi, Ngias Diri, PPK, Seni Jari enggau Literasi Komputer. Kus pengelandik tu dipejalai dalam timpuh pandak, sehari ngagai tiga hari ti ngemeratka ngagai raban diselinting ti datai ari raban nembiak, indai tunggal enggau raban indu ke bukai di kandang menua pesisir enggau semak mengeri,” ku iya nambah.

    Kelimpah ari nya, nuju transformasyen tu, KEMAS udah ngangkatka tikas setipikit pengelandik ti dikeluar ngagai pelatih ngagai siti tikas ti tinggi agi. Bisi dua bidang besai pengelandik KEMAS ba tikas Sijil Kemahiran Malaysia (SKM) ti diakun Opis Pemansang Pengelandik (JPK), Opis Menteri Pengatur Pekereja.

    ‘Dua bidang tu iya nya bidang bejait enggau berapi ti dipejalai apus hari di dua bengkah Pusat Bertauliah (Akademi Kemahiran KEMAS Seri Iskandar enggau Gopeng). SKM ti dibuka ngagai bala pelatih berengkah ari Tahap 1 ngagai Tahap 4 lalu udah nya Diploma Kemahiran Malaysia (DKM).

    “Modul pelajar enggau pengawa ngajar ti dikena di palan nya nitihka standard National Occupational Skills Standard (NOSS). Kelimpah ari nya, setipikit penyereta kus pengelandik mega diakun nerima SKM belalauka Pengiktirafan Pencapaian Terdahulu (PPT). Strategi tu nitihka Tunjang Kesebelas Transformasi KKLW “Memperluas TVET bagi Melahirkan Tenaga Kerja Berpendapatan Tinggi”, ku iya nambah baru.

    “Ukai semina nya aja, semua Pengajar Pengelandik KEMAS diakun enggau SKM, JPK enggau Opis Menteri Pengkereja. Pia mega, iya deka meri peluang ngagai bala pengajar KEMAS ke bisi diatu nambahka profesionalisme,” ku iya. ‘

    Sama bisi datai, Pemesai KEMAS Sri Aman, Josipah Sabas.

    Bisi 30 iku pesereta udah ngulu kus nya ti diatur pengelama enam hari di Palan Internet 1Malaysia Kampung Hilir enggau di Balai Suarah, Sri Aman. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads