Perintah seruran matau projek pemansang nengah SIMU. - Berita Iban Online

Header Ads

  • Baru Nyadi

    Perintah seruran matau projek pemansang nengah SIMU.

    MATU: Perintah nengeri seruran matau projek pemansang ke dipinta pengari rayat ba sitak diri dikena nentuka semua projek nya bejalai enggau mujur sereta nadai penanggul laun tembu.

    Menteri Muda ba Opis Kepala Menteri (Undang-Undang, Penyambung Sarawak enggau Perintah Besai enggau Matau Projek), Sharifah Hasidah Sayeed Aman Ghazali madah, nya kebuah perintah bisi numbuhka Unit Pematau Projek Nengeri (SIMU) dikena nentuka genap projek ke dipinta pengari rayat nadai tejanggal.

    “Kebuah pia laban perintah nengeri ngembuan perambu ke besai dalam ngubah nengeri tu nyadi menua ke lebih besemekih jemah ila. Nyekla deka berubah, kitai begunaka pemansang fizikal,” ku iya.

    Iya madah munyi nya rambau bejalai ngabas taba projek pemansang Langgur Pemansang Malaysia Lumpar Ke-11 (RMK-11) Agih Belanja Nengeri enggau Projek Transformasyen Menua Pesisir (RTP) Bagi Menua Mukah, apin lama ke udah.

    Sama bisi datai Kaban Kunsil Nengeri (ADUN) Jamoreng Datuk Juanda Jaya, Direktor SIMU Abdul Rahman Sebli, Sekretari Politik Kepala Menteri Faridah Osman enggau Dayang Nurfizawati Abang Abdul Karim, Sapit Residen Mukah Jack Aman Luat, Pemangku Pemesai Opis Kaunsil Pelilih Matu Wan Hipni Wan Mohamad enggau Injinir Pelilih Opis Parit enggau Entali Ai Mukah Fazal Suki.

    ADUN Samariang nya mega muji pengeransing dipandangka Juanda laban udah bebendar ngemansangka sitak Matu lebih agi DUN Jamoreng.

    Nya alai, iya ngarap sitak nya deka terus mansang lalu madah genap projek deka terus dipatau perintah nengeri.

    “Nama pekara ke beguna kitai patut meri sukung sereta kerejasama ngagai genap projek ke digaga perintah. Nyema bisi sebarang penanggul, kenatai ngagai YB Juanda lalu kami deka mutarka nya,” ku terang iya.

    Dulu ari nya, Dr Juanda meri besai pengaga ati ngagai Hasidah laban udah meri timbal ngagai kangau iya ngabas sitak Matu enggau Igan ke tuju gawa.

    “Nama utai ke dikearap kami iya pemansang ungkup rayat. Sehari tu kami ngabas sereta ngelala sekeda projek ke bisi penanggul lalu patut diputar ke pemaik rayat ditu,” ku iya.

    Berebak enggau nya, Hasidah sereta raban nya dibai ngabas Taba Projek Medan Selera di Pasar Pelilih Mit Igan enggau Taba Projek Ngaga Pelantar Simen ba Tebing Sungai Pasar Matu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads