Pesta Lumba Ai Long Lama deka diatur richah agi taun baru - Berita Iban Online

Header Ads

  • Baru Nyadi

    Pesta Lumba Ai Long Lama deka diatur richah agi taun baru

    CHAMPION: Dennis (tengah) begulai enggau Tim Ferarry 78 ari menua Brunei, menggi gelar Champion Kesemua Pesta Lumba Ai Long Lama.

    LONG LAMA: Berindik ari pemanah timbal lebih ari 6,000 iku pengusung ti datai meda Pesta Lumba Ai Long Lama ke udah diatur pengelama tiga hari berunggu ujung minggu nyin tadi, pengari rayat iya, Dennis Ngau, besemaya deka ngatur besai sereta richah agi ba taun baru.

    Kaban Kunsil Nengeri (ADUN) Telang Usan mega madah mayuh agi atur pengerami deka diatur sepengelama tiga hari ti meda lebih 3,000 pengusung ari luar datai napatka Long Lama lalu enda nyengkaum lebih 3,000 peranak besemak nedat pasar mit Long Lama, rambau atur pengerami nya.

    Ku iya, penatai bala pengusung ti majak nambah kenyau ari renggat keterubah atur pengerami nya dalam taun 2010 suba, udah nyenggala nyungkak ekonomi di pasar Long Lama.

    “Tu nyadi peluang ungkup peranak ditu ngulihka penatai pemisi, nya alai aku enggau komiti pengatur, enda alit ati nyema penyampau peranak menua tum akin nambah ngambi bagi ba pekit enggau pengawa bejual ba bangsal ti bisi disedia.

    “Siti pemansang ti manah endar sereta endang diperansang, tu ngasuh aku enggau komiti pengatur ngelanggur atur ti besai agi taun baru,” ku iya seraya nerima tempap jari ari bala pengusung ke bisi datai.

    Ku Dennis, iya mega ngelanggur ngemanjaika agi pengerami taun baru dikena meri ruang ngagai mayuh agi atur pengerami sereta peluang ngagai mensia mayuh ngambi bagi.

    Berebak enggau nya, iya meri terima kasih ngagai pengeras raban pengatur gawa enggau semua bala bukai laban udah nentuka pemujur pengerami tiga hari berunggu enggau nadai pekara bukai nyadi.

    “Terima kasih ngagai semangat lumba ti tinggai bala pesereta sereta semangat beserakup,” ku iya nambah.

    Iya mega madahka diri temegah ati ngagai semua kaban komiti pengatur enggau ejensi perintah ti udah bebendar gawa sereta komitmen sida dataika pengerami nya nyapai pemujur taja bisi betapi penanggul ba pekara belanja.

    Ba lansa ke sama ku iya, Pesta Lumba Ai Long Lama tentu berasai tekenyit meda tim menggi champion kesemua tau tu iya nya Tim Feraray 78 ari menua Brunei.

    Sama bisi datai ngulu pengawa nutup pengerami Residen Bagi Menua Miri, Sherrina Husaini, Pemesai Pelilih Telang Usan, Baru Tai sereta bala ketuai raban bansa. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads