Header Ads

  • Berita Tebaru

    Polis Sarawak udah sedia napi PRU14

    KAMI UDAH SEDIA: Zulkifli (kiba) bejaku ngagai pemberita di Pulapol Kuching kemari.
    PADAWAN: Direktor bagi KDNKA CP Dato Sri Zulkifli Abdullah netapka polis udah sedia napi Pengawa Bepilih Besai Ke-14 (PRU14).

    Ku iya ba aum pengarang berita di Palan Pematih Polis (Pulapol) Kuching kemari, penyampau raban polis ti deka ngintu pejalai PRU14 di serata menua udah ditetap.

    “Kitai udah netapka penyampau polis ti deka ngintu pejalai PRU14, iya nya ngintu pejalai pengawa ngantung nama chalun, maya bekimpin enggau hari muai undi.

    “Kitai mega udah nyendia latih ngagai pemesai polis ungkup PRU14. Kelimpah ari nya kitai mega ngaga latih ngintu pengelikun mensia mayuh,” ku iya.

    Tajapia Zulkifli madah penyampau raban polis nya bedau ulih dipadah ba maya ke diatu.

    Dulu agi ari nya Zulkifli udah bejadi pengawa nutup ‘Kursus Asas Pasukan Gerakan Am (PGA) Siri 2/2017 & Kursus Asas Marin Siri 1/2017’ di Padang Kawad Pulapol ditu.

    Iya nambah, unit LSF enggau PORU mega deka mantu maya nya ila ngambi ulih nentu pengelikun mensia mayuh.

    Kededua unit tu megai tanggungpengawa ke berat lalu kitai (Polis) udah sedia napi sebarang aja pemar ti deka datai, tandu Zulkifli.

    Ngenang kaul bukai, Zulkifli muji pemujur ti udah ditempa PGA ba taun 2016.

    PGA ku iya udah mujur ngerampas mayuh bengkah barang ba garis adan menua di Semenanjung Malaysia, Sarawak enggau Sabah ba penyampau RM13.5 juta.

    “Barang nya nyengkaum dadah, insap sereta orang ari menua lama ti tama enda beradat tauka pati,’ku iya.

    Ungkup polis marin ku iya nambah, ba taun 2016 udah mujur ngerampas barang ba penyampau RM 69.5 juta.

    Naka bulan September 2017 polis marin udah ngerampas barang ba penyampau RM58 juta, tandu iya. #UtusanBorneo

    No comments

    Post Top Ad