Program Pemansang Modal Mensia, Rampa Menua udah digaga di Rh Sekang. - Berita Iban Online

Header Ads

  • Baru Nyadi

    Program Pemansang Modal Mensia, Rampa Menua udah digaga di Rh Sekang.

    KAPIT: Sapit Menteri Pemansang Menua Pesisir enggau Kandang Menua, Datuk Alexander Nanta Linggi ke mega Kaban Parlimen (MP) Kapit udah bejadika program Pemansang Modal Mensia enggau Rampa Menua Begulai Enggau Komuniti enggau Kaunsil Pelilih Kapit (KDC) di Rumah Sekang @ Sigan Anak Renggie, Nanga Bawai, Baleh, bedau lama ke udah.

    Sekeda ari aktiviti bisi diatur nyerumba program nya nyengkaum pengawa ngasap ngemunaska nyamuk, licha ari sekeda ejensi perintah baka KDC, Opis Betanam Betupi, Opis Orang Gawa, Opis Tanah enggau Survei, Bomba, Opis Pelilih Bukit Mabong, Opis Polis enggau Opis Pengerai, pengawa nunjukka chara ngerara api, pengawa beripai meresi kandang ngelingi rumah panjai, nanam tambak kayu, pekit ngelinsu nembiak mit sereta sukaneka.

    Bejaku ba mua bala mayuh, Nanta muji KDC ti udah bejalaika inisiatif ngatur program nya ungkup bala komuniti di kandang menua pesisir sereta mega meda kaul mayuh bengkah ejensi perintah.

    “Tu siti ari program Strategi Tasik Biru Nasional (NBOS) diatur begulai enggau projek pengawa kunsi pintar ngena aset mayuh bengkah ejensi perintah pulaika pemaik rayat,” ku Nanta.

    Iya berasai lantang beratika kaunsil nya bejalaika program ti meri pemerat ba pekara pengerai enggau penyedar ba rampa menua di kandang menua pesisir kelebih agi ngaul Komiti Pemansang enggau Pengelikun Genturung Pendiau (JKKK) ke mega di baruh KKLW laban gaji tuai rumah dibayar opis menteri.

    Ba pekara pemansang, ku Nanta, strategi perintah diatu meri pemerat ba pengawa nyambung menua pesisir nengah jalai standard R1, Program Jiwa Murni, Program Transformasyen Menua Pesisir (RTP) sereta ngangkat ngemanahka jalai kompeni batang.

    “Kitai dekaka mayuh agi sambung ti ngemai pemansang jalai jampat agi nengah jalai standard R1 di baruh Program Jiwa Murni, RTP sereta ngemanahka jalai batang ungkup peranak di menua pesisir laban pengawa ngaga jalai ti standard begunaka timpuh ti lama,” ku Nanta nyemetak.

    Sama bisi datai Kaban Kunsil Nengeri (ADUN) Pelagus, Wilson Nyabong Ijang, Sekretari Politik Kepala Menteri Sarawak Tapah Ata, Ketuai Kunsil Opis Pelilih Menua Kapit Kaunsilor Philimon Nuing, Sapit iya Kaunsilor Lawrence Listin Baling, 16 iku tuai rumah ari rumah panjai besemak sepemanjai Baleh sereta peranak rumah panjai eggau temuai ke bukai.

    Philimon bisi bejaku dulu ari nya meri terima kasih ngagai JKKK Rumah Sekang @ Sigan udah setuju ngatur program ti nyediaka awak ungkup peranak menua pesisir ngaul diri semak enggau ejensi perintah sereta bala pengari rayat.

    Iya mega meri terima kasih ke sukung mayuh bengkah ejensi perintah ba kaul kerejasama rat nyediaka licha penerang ba pangku pengawa nyengkaum polisi baru ti bisi di opis sida empu.

    Ngelansa pasal program nya ku Philimon, piak kaunsil udah merambu deka ngatur di enam sitak kunsil nengeri di Bagi Menua Kapit baka di Katibas, Bukit Goram, Pelagus, Baleh, Belaga enggau Murum taun tu.

    “Naka diatu, kami udah ngatur empat program enggau keterubah di Baleh, kedua di kandang menua Murum, program ketiga di Katibas lalu keempat di Rumah Sekang ungkup kandang menua Pelagus.

    “Program udah tu deka diatur di Bukit Goram, nitihka perambu di Rumah Rambor Belansai, Nanga Melipis dalam bulan Oktober lalu di Uma Sekapan Panjang dalam pelilih Belaga ti deka diatur dalam pun bulan November” ku iya.

    Iya nyamin piak kaunsil deka terus bejalaika program ke bansa nya ninting taun.

    “Senentang endur ngatur enggau hari bulan tetiap sitak deka diputuska bala kaunsilor ila,” ku iya.

    Berebak enggau program nya, ngarika piak kaunsil, Philimon ngemendarka agih belanja ari kaunsil penyampau RM10,000 ungkup JKKK Rumah Sekang dikena bejalaika pengawa pemansang ti patut ba pemanah rampa rumah panjai enggau sistem parit. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads