Header Ads

  • Berita Tebaru

    Projek jalai Jiwa Murni ditampung 297.5 km beungkus RM866.9 juta

    Tan Sri Datuk Amar James Jemut Masing
    KUCHING: Pengawa ngaga jalai nengah projek Jiwa Murni di Sarawak dipajakka enggau pengawa ngaga sereta ngelanggur jalai semanjai 297.5 kilometer agi, ti begunaka ungkus belanja sepenyampau RM866.9 juta.

    Pekara nya dipadahka Sapit Kepala Menteri Tan Sri Datuk Amar James Jemut Masing seraya madahka jalai ke udah tembu ngena konsep nya iya nya 214.1 kilometer ke beungkus belanja RM250 juta.

    “Jalai tu nyendiaka penyambung ngagai peranak menua pesisir lalu enti nadai tu, deka nadai terus ngembuan jalai ungkup perengka pengangkut darat.

    “Nya digaga dikena nampung penguna perengka pengangkut enggau penyampau ti mimit, lalu ukai ungkup lori berat,” ku iya ti nyadi chairman ba opis Unit Penyelarasan Pelaksanaan, Jabatan Perdana Menteri di Putra Jaya kemari.

    Aum nya sama digulu Kaban Parlimen Hulu Rajang Datuk Wilson Ugak Kumbong, Menteri Muda Perengka Pengangkut Datuk Dr Jerip Susil, pegawai ari Kementerian Pertahanan, Pejabat Perdana Menteri, Kementerian Kewangan, Pejabat Setiausaha Kerajaan Negeri, Unit Perancang Ekonomi enggau Jabatan Tanah dan Survei.

    Entara jalai Jiwa Murni ti deka digaga enggau lengkas baka ti udah dipesetuju dalam aum nya ku iya, Long Lopeng-Ba’ Kelalan, Mejawah-Belaga.

    “Aku udah madah ngagai komiti enda ngira nama jaku mensia mayuh, projek jalai Jiwa Murni enda tau enda dipajakka awakka ulih nyendiaka penyambung ngagai peranak di menua pesisir.

    “Kitai deka ngereja tauka bejalaika enggau naka pemanah ke ulih,” ku Masing ti mega Menteri Pemansang Infrastruktur enggau Perengka Pengangkut.

    Kelimpah ari nya, Ugak madahka diri amat gaga ati enggau asil ke dikaum nya laban nya berita manah ke dianti rayat dalam sitak iya.

    Pengawa ngaga jalai Menjawah-Belaga ku iya, amat besai reti ngagai peranak di kandang menua ulu ba sitak nya.

    Projek ngaga jalai Jiwa Murni endang patut dipajakka laban nya lebih murah dibandingka enggau jalai digaga Jabatan Kerja Raya (JKR).

    “Pekara ke pemadu beguna diatu iya nya bisi jalai penyambung nuju ngagai kandang menua ulu ngambika ngemuntang sereta ngenyamaika peranak mindah,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: