Rayat agi ngasaika penyeranta taja rumah semina 10 KM ari pasar - Berita Iban Online

Header Ads

  • Baru Nyadi

    Rayat agi ngasaika penyeranta taja rumah semina 10 KM ari pasar

    SIBU: Taja semina 10 Kilometer (KM) tauka urung 15 minit penyauh ari pasar besai, peranak Kampung Seduan Jaya agi ngasaika penyeranta ari sukut perengka guna jalai raya.

    Enti nitihka takah ari sitak mengeri, penanggul nya enda patut bisi tang peranak ditu agi bedarat ari simpang ngelawa rumah sida.

    Penyeranta baka tu enda patut nyadi laban nya bepalan ba mengeri lalu pekara nya chukup ngalitka ati.

    Siku peranak genturung pendiau nya ke benama Philip Tera, 44, madah ngagai Utusan Borneo kemari, penanggul nya semua diasaika lebih 10 pintu rumah ke bepalan ba puting genturung pendiau nya.

    Tang sida ke diau ba mua enggau tungga ke tengah genturung nadai napi penanggul nya lalu tu mansangka sida dikemelu ari ngasaika pengelantang baka orang bukai.

    “Sida ke diau ba mua enggau tengah genturung tu enda sebaka enggau utai diasai kami ke diau ba puting genturung pendiau.

    “Semua projek pemansang baka lampu jalai enggau pengawa ngemanahka jalai genturung pendiau tu semina diberi ngagai sida ke diau ba penatai jalai enggau naka tengah aja aja. Kami ke diau ba ujung nadai dikeibuh taja pekara nya kala dikompelin ngagai piak bekaul.

    “Tu mih chukup ngalitka ati nyau baka bisi ‘tangan ghaib’ tauka opiak bekaul nagang pemansang dipejalai ngagai kami ke diau ba ujung genturung pendiau tu,” ku iya.

    Philip madah jalai tama ngagai genturung pendiau sida ari simpang ngembuan penyauh 200 meter aja tang jalai enda ulih ditengah kerita laban ke lichin sereta luchak.

    Ku iya, nya endang tuchi tanah lalu semua peranak genturung pendiau ngengkah entukar sida ba simpang jalai lalu bedarat nyema deka pulai ke rumah tauka nurun gawa.

    “Nama ke chukup ngasaka kami iya nya maya bala anak deka nurun ke sekula urung pukul 5 pagi. Sida nyau bedarat nujah luchak sereta lichin. Udah datai ba simpang jalai baru sida masukka stokin enggau kasut.

    “Peranak ke diau ba ujung genturung pendiau tu ngembuan urung 35 iku nembiak sekula lalu semua sida ke diau dia lebih 70 iku nengah jalai ke sebaka,” ku iya.

    Iya madah, maya tong gis dikena berapi sereta bebelika barang dapur sida serumah nyau bedarat mai barang diri.

    Ku iya, nyema bedarat ari simpang nyentuk ke ujung ngambi awak lebih 15 minit.

    Lebih ngenyinu, ku iya maya bisi penusah rabat sida serumah nyau bedarat mai sentubung ari simpang ngagai rumah orang ke tusah.

    “Penanggul iya kebendar jalai nya nadai dikemanah lalu pekara tu udah kelalu lama ditapi nyentuk kami nadai ulih ngetat agi. Udah suah ngenatai peminta tang nadai nerima timbal.

    “Ukai kami ninding meda sida ke diau ba pun jalai enggau tengah genturung pendiau tang kami nyau baka dikemelu. Maya bisi pemansang sida ke mua enggau tengah aja ke bulih. Taja kami ngelama tu kala ngenataika peminta ngagai piak bekaul,” ku tandu iya.

    Philip madah taja sida diau ba sitak pasar besai tang sida agi auska pemansang taja udah ngasaika pemisi bekal karan enggau ai.

    Iya madah mega ba jalai sida nya bisi dua tiang lampu jalai tang nadai ulih guna semina tiang aja ke chegi-chegi.

    Ku iya tu nyangka laban pendiau jalai ke chukup jai ngujungka piak bekaul enda masang lampu jalai ditu taja udah bisi didirika tiang.

    “Nama utai ti ngalitka ati iya nya piak bekaul nyau nambahka agi lampu jalai ba tungga tengah genturung pendiau.

    “Piak bekaul nirika tiang nya 10 meter penyauh dibanding enggau standard lama 100 meter takah entara tiang-tinga lampu.

    Nitihku iya, simpang besai genturung pendiau tu ari jalai alun nadai ngembuan lampu lalu tu tau ngeruga pengelikun sereta ngenusah orang luar deka ngiga Kampung Seduan Jaya.

    “Nya mih nyelai, ba tengah genturung pendiau digaga mayuh lampu jalai taja kebendar ba mua jalai mih ke patut bisi digaga lampu.

    Ba sitak tengah genturung pendiau tu, takah lampu jalai kelalu semak sereta nadai nitih standard,” ku iya seraya ngarapka piak bekaul ulih ngesah mutarka penanggul sida.

    Kampung Seduan Jaya ngembuan urung 75 buah rumah enggau sitak nya udah digazet perintah nyadi pengentap pendiau rayat taun 2014. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads