RGC Long Lama deka majak dikemansang ku Uggah - Berita Iban Online

Header Ads

  • Baru Nyadi

    RGC Long Lama deka majak dikemansang ku Uggah

    TEPA: Uggah nguji nebah sape seraya dikemataka (empat ari kiba) Dennis), (tiga ari kanan) Wilson enggau ke bukai.

    KUCHING: Perintah deka neruska pengawa ngemansangka Palan Pemansang Menua Pesisir (RGC) Long Lama, laban ti nemu pemesai guna palan nya ngagai mensia mayuh ba menua nya.

    Sapit Kepala Menteri, Datuk Amar Douglas Uggah madahka RGC Long Lama nya entara 12 RGC ke ditumbuhka perintah di nengeri tu di menua pesisir.

    “Diatu kitai benung mansik bekaul 12 RGC tu sekalika dipajak tauka ditangguh dulu.

    “RGC Long Lama tu deka terus dikemansangka laban tu deka nyadi sebengkah palan pemansang ti kena bungkur dalam Ejensi Pemansang Tanah Tinggi Sarawak, lalu ejensi tu ari baruh Lembaga Pembangunan Koridor Wilayah (RECODA),” ku iya.

    Uggah mansutka pekara nya ba pengerami nutup Pesta Lumba Ai Long Lama & Penumbuh Kedua Taun Pelilih Telang Usan ke diatur ba Dewan SJKC Tee Long Lam Baram, Miri, apin lama.

    Berebak enggau nya iya madahka perintah deka ngaga langgur sereta dibantu RECODA ngemansang kandang menua Long Lama nengah RGC.

    “Nya alai RGC tu (Long Lama) amat beguna ba pemansang menua pesisir,” ku iya.

    Bejaku baru iya madahka perintah ti nengah iring Kepala Menteri Datuk Patinggi Abang Johari Tun Openg deka ngenukuka pemansang di menua pesisir chakah dipejalaika ngambika menua enggau rayat ke diau di menau pesisir sama ulih ngasaika pemansang ke dipejalaika Barisan Nasional.

    Ku Uggah, Abang Johari seiku ketuai ke siru enggau sereta beratka rayat lalu numbuhka ejensi pemansang tanah tinggi ti mungkur kandang menua Long Lama.

    “Tu (ejensi) ditumbuhka dikena nentuka program pemansang ba kandang menua tu diatur enggau engkeman tauka teratur.

    “Laban kandang menua tu bisi peluang ti sebaka enggau di Cameron Higland ti mekal barang betanam betupi baka nyual buah, sayur sereta bungai ngagai luar mengeri, pia mega di menua Kundasang.

    “Nya alai aku arap bendar enggau pengelandik sereta penau RECODA sereta kerejasama bala YB ba kandang menua tu, aku arap bendar kandang menua tu ulih dikemansangka nyadi kandang endur betanam betupi moden ti ukai semina di Sarawak aja tang di Malaysia,” ku Uggah.

    Kelimpah ari nya lebuh ke ngenang pasal Pengerami Lumba Ai Long Lama, Uggah madahka pengerami nya meri peluang ngagai orang dagang bejualka barang sereta ulih narit peranak luar baka ari Brunie kelimpah ari peranak menua tu empu.

    Tu mega peluang endur bala rayat kelebih agi peranak dalam kandang menua nya ngempitka kaul enggau pangan diri seraya ngetanka penyerakup, pemaik enggau pengelantang.

    “Aku ngasaika tuju ngatur lumba enggau main ai tu tejapaika tuju iya diatur.

    “Pia mega pengawa ngintu genap dua taun pelilih menua Telang Usan, penumbuh tu nyadika bukti batang tuju perintah numbuhka pelilih menua Telang Usan udah diasaika rayat,” ku iya.

    Sama bisi ba pengerami nya Kaban Kunsil Nengeri (ADUN) Telang Usan Dennis Ngau, Ketuai Pegawai Eksekutif RECODA Sarawak Tan Sri Datuk Amar Wilson Baya Dandot enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads