RM20,000 ungkup pemansang pelajar 10 buah SJKC di Batu Kawah. - Berita Iban Online

Header Ads

  • Baru Nyadi

    RM20,000 ungkup pemansang pelajar 10 buah SJKC di Batu Kawah.

    UNGKUP PEMANSANG PELAJAR: Wong (enam kanan), Liu (empat kanan) begulai enggau pemesai sekula Tadika SJKC Chung Hua, Pasar Batu Kawah Lama begambar ba ringkat satu, rumah tadika SJKC Chung Hua.

    KUCHING: Sepuluh buah Sekula Primari China (SJKC) di sitak Batu Kawah deka nerima geran RM20,000 ari Menteri Wang Kedua, Dato Sri Wong Soon Koh, ke penyulut nembiak taun baru tu ila.

    Wong lebuh dikerandau pengudah muka Tadika SJK Chung Hua semak ditu, kemari madahka di sitak Batu Kawah, bisi 10 buah sekula primari China ti deka nerima RM2000 tiap sekula, lalu piak pengatur di tetiap buah sekula nya diasuh milih nembiak sida iya ke pengabis nyulut nerima geran nya nya.

    “Geran RM20,000 nya ke sepuluh buah sekla di sitak Batu Kawah, nya alai, tejuka piak pengatur sekula tu milih nembiak sida iya ke pengabis nyulut nerima geran nya,” ku Wong.

    Atur pengawa nya bela digulu ulih Chairman, Gerempung Lembaga Pengurusan Sekula Cina, ke pelilih menua Kuching, Samarahan enggau Serian, Liu Thian Leong, ti mega nyadi Penyanding Penemu United People’s Party (UPP) sitak Batu Kawah.

    Ba lansa bukai, Wong ti mega nyadi Menteri Pengawa Dagang Entarabansa enggau E-Dagang madahka pemun pelajar di sekula anak mit (kindy) ke pengabis iya berat ba pemansang anak mit, alai maya umur bansa tu, nembiak mit ngemansangka pengerindu sida iya ba pelajar, sekalika sida iya bisi tauka nadai ati deka belajar, bepun ari sekula anak mit tu.

    “Enti kitai ke nyadi apai indai tauka pengajar, enda meransang tauka ngajar sida iya jalai ke salah, nyangka inisiatif tauka pengerindu sida iya ba pelajar tau ngerusakka sida iya, lalu ngujungka sida iya nadai ati deka belajar.

    “Nya alai, pemun pelajar ari sekula anak mit, siti pemerat dalam pelajar seiku-seiku kitai. Aku mega meri jaku selamat ngagai sekula tu laban udah ngaga rumah sekula ke lantang alai anak mit belajar, siti pemun ke manah, ngambika sida iya mai pengerindu sida iya belajar ari pemun bansa tu datai ngagai sekula primeri enggau sekondari,” ku iya, ke bisi mega nambah bantu RM5,000 kena sekula anak mit nya, ngaga kipas sereta masang aircond sereta perengka guna bukai.

    Ba atur pengawa nya mega, Wong bisi meri geran kena ngaga rumah sekula dalam penyampau, RM100,000 ngagai SJKC Chung Hua Sg Tengah, Batu Kawah.

    Ba atur pengawa nya mega, Chairman Gerempung Lembaga Pengurusan Sekula Cina, ke pelilih menua Kuching, Samarahan enggau Serian, Liu Thian Leong madahka penyampau ungkus ngaga sekula anak mit tiga ringkat nya, manggai RM310,000, alai ari penyampau nya, RM10,000 diberi gerempung nya, lalu urung RM200,000 diberi UPP Batu Kawah (ke digumpul ari raban parti nya nyengkaum diberi Liu empu).

    “Pemuka palan nyeridi anak mit Tadika SJK Chung Hua, mai pemerat ngagai kami semua, alai kami ngamatka komitmen sereta semaya kami,” ku Liu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads