Sarawak menua pemadu mayuh ngeluarka mulung di dunya. - Berita Iban Online

Header Ads

  • Baru Nyadi

    Sarawak menua pemadu mayuh ngeluarka mulung di dunya.

    BESERAKUP: UiTM Sarawak diarika (kiba) Jamil betukar dokumen ke udah disain enggau Society of Sago Palm Studies, Japan ti diarika presiden iya Prof. Dr Hiroshi Ehara, besaksika (tiga ari kiba) Asso. Prof Dr Rasidah Mahdi ari UiTM enggau (kanan) Prof. Yukio Yoyoda ari Rikyo University,Japan seraya dikemataka Uggah.

    KUCHING: Sarawak menua ti pemadu mayuh ngeluar tauka nyual mulung ninting taun dibandingka enggau menua bukai ke bisi nanam mulung.

    Kepala Menteri Datuk Patinggi Abang Johari Tun Openg madah, senipak enggau pengelebih pemansang ekonomi Sarawak, ‘kanji’ mulung ukai semina pemakai nyadi batang pemakai tauka pemakai asal ngagai sekeda pupu bansa di nengeri tu baka Penan enggau Melanau, tang udah meri asil penatai pemisi.

    Mulung ku iya, diatu agi dianggap pemakai ke ditanam pemadu mimit di dunya sereta ba sekeda menua baka Indonesia enggau Papua New Guinea agi nyadika mulung batang pemakai.

    Di Malaysia, kelimpah di Sarawak, kandang endur nanam mulung asal udah dikurangka ketegal pemansang industri sawit.

    “Diatu nengeri (Sarawak) pemadu mayuh nyual mulung di dunya, ninting taun ulih nyual urung 25,000 ngagai 40,000 tan produk mulung ngagai Semanjung Malaysia, Jepun, Taiwan, Singapura enggau menua bukai,” ku iya.

    Abang Johari mansutka pekara nya dalam teks jaku iya ti dibacha Sapit Kepala Menteri Datuk Amar Douglas Uggah Embas ti ngarika iya bejadika Simposium Mulung Antarabansa Ke-13 ti diatur Univerisiti Teknologi MARA (UiTM) Sarawak ba sebuah hotel ditu, kemari.

    Nitih ku Abang Johari ti mega Menteri Wang enggau Perambu Ekonomi, dalam taun 1990an mulung udah diaku nyadi ‘lumbung emas’ ba abad ke-21, lalu dalam 1997 ba sebengkah artikel ngeluarka ripot madahka mulung deka nyadi utai tanam ke chukup berega jemah ila.

    Sarawak udah beranak puku dikena ngangkatka produktiviti mulung sereta berani nyadi menua ti keterubah di dunya nanam mulung ba tanah pemesai 55,000 hektar manggai ba taun 2013, ku iya.

    “Nambahka nya, perintah Sarawak udah mujur ngempung tanah lalu numbuhka kebun ti urung 2,883 hektar ti mungkur 4,875 pekebun mit nengah program Sago Smallholder Satelite Estate Development ti dipejalaika Ejensi Pengemata Pemansang Tanah ( LCDA),” ku iya.

    Penyulut enggau pengulih besemekih ba makit dunya bepanggai ba kualiti kanji enggau produk mulung sereta ukai patut semina dikemeratka ba industri keterubah nyengkaum industri ti nangkanka nya.

    “Kitai patut nambahka intensiti pengawa mansik enggau pemansang dalam empat pekara iya nya nambahka asil kanji, ngurangka timpuh mulung nya tuai baka ke diatu begunaka 10 ngagai 15 taun, baru tau ditebang ngagai timpuh ke pandak agi iya nya ngagai lima taun aja, ngurangka ungkus ngasilka mulung enggau ngemeranka inovasyen baka ngena ‘extraction’ teknologi ke pemadu baru,” ku iya.

    Dalam jaku pengelalu, Rektor UiTM Sarawak Prof. Datuk Dr Jamil Hamali madahka nyerumba simposium nya piak universiti nya bisi nyain Sempekat Pemereti Ati (MoU) enggau Society of Sago Palm Studies, Japan.

    Jamil madahka diri temegah ati laban ulih beserakup enggau pemansik ari Jepun lalu nya nyadi pemungkal ngagai pengawa betukar kereban, pemansut enggau penerang bekaul enggau projek antarabansa.

    “Kededua organisasyen ulih ngemeranka pengawa begulai lebuh bejalaika pansik bepelasarka pelajar, seminar, program pelajar, aum besai sereta ke bukai dalam isu ke deka dipansik.

    “Kitai arap bendar nengah sempekat tu kitai ulih ngenegapka agi chara ti inovatif dikena ngemajuka industri mulung nengah pengawa pemansik akademik,” ku iya.

    Urung 200 iku pesereta simposium ari lapan bengkah menua ti deka bejurai sereta berandauka 8 keretas penuh, 16 keretas teknikal enggau 6 poster, dalam timpuh simposium sehari lebih. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads