Sarawak meseti nyingkang ngagai tikas ekonomi digital. - Berita Iban Online

Header Ads

  • Baru Nyadi

    Sarawak meseti nyingkang ngagai tikas ekonomi digital.

    LONDON: Entara pekara ti bisi dipejurai sereta dibantaika Kepala Menteri Datuk Patinggi Abang Johari Tun Openg maya meri jaku ba ‘Commonwealth Diplomats Induction Programme’ ke diatur di Malborough House di London, iya nya pasal peneleba Sarawak sekumbangka ngemansangka ekonomi, ngetanka penyerakup pupu bansa enggau pengarap, nyaga rampa menua sereta jelu siga, ngemansangka pemisi kuasa ke ulih dikena baru sereta ngemansangka pemujur ekonomi menua tu.

    Abang Johari ti dikangau meri jaku ulih sekretariat komanwel nya, madahka pemerat Sarawak ke deka ngubah menua diri nyadi sebuah menua digital napi revolusi digital baka ke nyadi diatu.

    “Sarawak enda tau enda nginsit ari gaya ekonomi lama lalu mekuh ngagai tikas ekonomi digital, laban enti enda, Sarawak deka tinggal di belakang,” ku iya.

    Ba siti tanya ari bala mayuh, saut iya bekait enggau polisi perintah nengeri ke diatu, iya madah:

    “Perintah Sarawak enda tau enda nempa polisi setipak enggau peneka nembiak rebak baru. Di Sarawak, pemayuh nembiak ke diau di menua tu manggai urung 60 peratus ari pemayuh mensia ke diau ditu.

    “Pejalai nuju ekonomi digital deka meri peluang ngagai bala nembiak ke bepengelandik dalam internet betatika kaul sida tu enggau ekonomi digital,” ku iya.

    Sebedau nya, penatai Abang Johari enggau raban pemesai bukai di Malborough House, iya disambut Sekretari Besai Komanwel, Baroness Patricia Scotland.

    Ba pejalai tu mega, Abang Johari enggau raban pemesai ari Sarawak ke sama nyempulang pejalai iya ke London, sekretariat Komanwel mega bisi mai Kepala Menteri enggau raban diterang pasal ‘Commonwealth Leadership Academy’ ke bisi kerejasama enggau Sarawak.

    Sama bisi nyereta pejalai tu, Sekretari Perintah Sarawak, Tan Sri Datuk Amar Mohamad Morshidi Abdul Ghani, Sapit Sekretari Perintah Sarawak, Datu Sabariah Putit enggau chairman pengatur Emerging Leaders Dialogue Asia 2016, Adrian Jerome.

    Ba randau setengah jam Kepala Menteri enggau Scotland, mayuh bejurai pasal ngaga palan kena ngemanahka agi atur ketuai ba entara tuai-tuai ke baru deka angkat ngiring menua Komanwel.

    Abang Johari enggau bala pemesai bukai ari Sarawak mupuk pulai ke Kuching baru kemari pengudah raun seraya belajar pengelama dua minggu ba menua Eropah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads