Header Ads

  • Berita Tebaru

    Sarawak ngemeranka Jaku English dalam pekara rasmi

    ENGLISH JAKU KEDUA DI SARAWAK: Manyin (kanan) nyuaka bup sereta tepa bukai ngagai seiku ari speaker ke simposium tu, Prof Charles Hopkins, Senior Fellow ari UNESCO.
    KUCHING: Sarawak agi ngemeranka Jaku English dalam tetiap pengawa ke digaga. Berindik ari pekara tu, semua pengawa rasmi di nengeri tu endang agi ngemeranka Jaku English nyadi jaku rasmi.

    Menteri Pelajar, Sains enggau Pansik Teknologi, Dato Michael Manyin Jawong madahka, nengeri Sarawak agi negika Jaku English, nya kebuah dalam aum Kunsil Nengeri (DUN) Jaku English dikena, surat rasmi pan agi ngena Jaku English sereta pekara ke bukai, ku iya lebuh ti bejaku nutup pengawa ‘Sarawak English Language Education Symposium; Connecting the Dots : Curriculum, Classroom, & Community’ ke udah digulu urung 1000 iku pengajar enggau kepala pengajar di sebuah hotel ditu.

    “Ex-Kepala Menteri sebedau tu, niang Datuk Patinggi Tan Sri Adenan Satem kala nyebut iya nya, Jaku English tu nyadi jaku ke dikena di menua tu kelimpah ari Jaku Melayu.

    “Laban ba baruh Artikel 152 baruh Konstitusyen Perintah Besai, ke dibacha sama enggau Danji Malaysia (MA) 1963, kitai agi bisi (leverage) ngena Jaku English.

    “Atur kitai nya, ukai deka ngelaban Konstitusyen Perintah Besai, tang laban kitai di Sarawak agi deka negika Jaku English, tuai pemesai kitai pan agi ngetanka Jaku English,” ku Manyin.

    Sama bisi enggau ngulu pengawa tu kemari, Sekretari Mendam opis menteri nya, Datu Surdasono Osman enggau Direktor JPNS, Rakayah Maadon.

    Ba pemungkal perintah nengeri Sarawak ngangkatka Jaku English, nengah opis menteri nya, minta semua sekula di nengeri tu ngena kededua Jaku Melayu enggau Jaku English lebuh ti ngaga papan tanda di sekula.

    Nya alai ku iya, Kepala Menteri Datuk Patinggi Abang Johari Tun Openg ngelalau tiap iku rayat Sarawak betatika Jaku English.

    “Awakka lalau tu datai ari Opis Kepala Menteri, iya nya Sarawak betatika Jaku English. Nya alai, tiap buah sekula, genturung pendiau, tiap pelilih menua tauka sitak, beratika lalau nya,” ku iya.

    Sebedau tu ku iya, opis menteri sida udah nganjung surat ngagai semua Kaban Kunsil Nengeri (ADUN) nyengkaum Kepala Menteri, iya nya ngasuh sida ngiru sebuah sekula tauka lebih ari nya di sitak sida, lalu enti udah dikemendar ulih apai indai enggau pengajar, nyengkaum ADUN, projek nya deka dimunka, alai nembiak, pengajar lebuh udah masuk dalam laman sekula, udah tau berengkah bejaku English.

    “Urung 2 billion mensia mayuh di dunya tu bejaku English, semua menua dalam dunya tu enggau naka ulih ngemanahka Jaku English sida iya, laban tu jaku ke dikena dalam pengawa dagang, Sains, Injinis, Diplomasi enggau sida ke bepengelandik, surat ke dichelak semua dalam Jaku English.

    “Kitai pan enggau di tinggal, lalu aku ngarapka simposium tu, nadai siku kitai ngeleseyka pangan diri bejaku English di sekula tauka ba barang endur,” ku iya.

    Taja pia, Manyin ti mega nyadi ADUN Tebedu madahka Perintah Menua Sarawak sigi meransang rayat menua tu bejaku English.

    “Tu Jaku kedua menua tu kelimpah ari Jaku Melayu. Tuju iya laban deka meransang rayat Sarawak, mit tauka besai nguji bejaku English.

    “Enti Jaku Kebangsaan kitai Jaku Melayu, nya nadai penanggul laban udah nyapai pemerat tuju ngempung semua pupu bansa etnik di menua tu, laban nyauka semua kitai nemu bejaku dalam Jaku Melayu,” ku iya, lalu ngarapka asil simposium tu ila deka dibai ngagai aum lalu meri sadang ngagai Opis Menteri, penemu ke deka dipadah ngagai Perintah Menua. #UtusanBorneo

    No comments

    Post Top Ad