Sarawak ulih kaya enti pemisi ai dikemansang manah - Berita Iban Online

Header Ads

  • Baru Nyadi

    Sarawak ulih kaya enti pemisi ai dikemansang manah

    KENA BAKA TU: Sum (dua kiba) nyaup Abang Johari ngerasukka tepa ti diberi kelai basa enggau meri berekat seraya dikemata bala bukai. — Gambar Opis Pemadah

    KUCHING: Kepala Menteri Datuk Patinggi Datuk Amar Abang Johari Tun Openg madahka Sarawak ukai semina diberekat enggau penegap ba politik berindik ari pengelantang raban bansa tang mega kaya enggau pemansut kelebih agi ai.

    Iya nyemetak madahka Oksigen enggau Hidrogen ulih diekstrak ari ai nyema teknologi pemadu baru dikena bejalaika pengawa ekstrak ari menua Jerman ditunda perintah nengeri tu.

    Abang Johari andal amat teknologi dikena ngemanah ba pemansut ai ulih dipejalai di Sarawak laban nengeri tu udah bisi penau sereta pengelikun ngemuntangka agi pengawa ba industri ke bansa nya.

    “Kitai ulih nyadi orang Arab ke baru. Orang Arab kaya minyak. Kitai kaya laban bisi ai. Nya alai, peranak Sarawak tu ulih nyadi orang Arab ke baru,” ku iya rambau makai lemai ba sebengkah pengerami diatur Serakup Lun Bawang Sarawak Pampang Kuching.

    Iya enggau raban ari nengeri tu udah nemuai ngagai Jerman dalam penemuai seraya belajar nyerungkai teknologi ke bansa nya, apin lama ke udah.

    Ku Abang Johari, iya mega deka betemu enggau Menteri Besai Datuk Seri Najib Tun Razak enggau Sapit Menteri Besai Datuk Seri Dr Ahmad Zahid Hamidi berandauka pengawa ngaga baru 260 buah sekula di Sarawak.

    Ku iya, nyauka semua sekula nya udah kelalu buruk.

    Lebuh bejadika pengerami makai lemai Pengawa Mandangka Main Asal Lun Bawang di sebengkah hotel ditu kena malam Hari Minggu, iya bisi didinga nyebut deka melanja projek ti ngaul Bank Pemansang Sarawak enggau belanja ari perintah besai.

    Ku Abang Johari, iya meseti bejalaika undang-undang Imigresyen khas di nengeri tu laban iya deka nyaga penyerakup raban bansa di Sarawak.

    Iya madahka diri enggai meda pekara negetif tama ngagai nengeri tu lalu ngeruga pengelantang raban bansa enggau jalai pengarap ti udah ditempa sereta diasaika peranak Sarawak ngelama tu.

    Iya mega nyamin peranak Sarawak ke alai UMNO enda deka dikemendar ngerembai sayap sida ngagai nengeri tu.

    “Pengelantang raban bansa enggau penyerakup nyadi gaya pendiau kitai, nya alai kitai semua patut nyaga penyerakup tu. Kuching nyadi indu mengeri di Sarawak ti udah dituku nyadi Mengeri Penyerakup (Bandar Perpaduan), ukai ari kitai tang orang ari luar.

    “Reti iya, sida ngaku sereta nemu Sarawak tu nyadi nengeri chunto ti patut ditunda ba pekara pengelantang enggau penyerakup raban bansa,” ku iya.

    Iya mega mejah ulah siku orang (personaliti) ba kimpin anti-Pesta Beer di Selangor lalu madahka Sarawak nadai isu pasal atur pengawa ke bansa nya.

    Kepala Menteri udah ngemendarka RM50,000 ngagai Serakup Lun Bawang Sarawak Kuching ti diketuai Suriya Charles Buas sereta RM50,000 da agi ngagai pampang nyadika anak belanja dikena ngepunka pengawa ngelangkar begunan sida.

    Sapit Kepala Menteri Datuk Amar Awang Tengah Ali Hasan mega bisi ngemendarka RM20,000 ungkup pampang serakup nya seraya Sekretari Politik Kepala Menteri, Abdullah Saidol ngemendarka belanja dikena nyaup sekeda ungkus atur pengerami malam nya.

    Nitih ku Suriya, batang tuju atur pengerami lemai nya dikena ngempuruka semua kaban di Kuching sereta mega mandangka pengaya ba main asal enggau adat komuniti Lun Bawang ngagai peranak Sarawak ke bukai.

    Tebal agi bansa Lun Bawang diau di Lawas.

    Sida ti udah nyapai penyulut ari komuniti nya dalam mayuh bengkah bidang di renggat nasional enggau antarabansa mega bisi dibai lalu dikelala ba mua mayuh.

    Iya mega madahka penatai Abang Johari rambau atur pengerami makai lemai nyadi kenang pemadu manis ngagai sida.

    Kelimpah ari Abang Johari, Awang Tengah enggau Abdullah, bala temuai dipebasa ke bukai ti bisi datai iya nya Sapit Menteri Dagang Dalam Menua, Koperasi enggau Orang Bebelika Barang Datuk Henry Sum Agong ke lalu nyadi Kaban Parlimen (MP) Lawas, Kaban Kunsil Nengeri (ADUN) Ba’Kelalan Baru Bian, ADUN Batu Danau Paulus Palu Gumbang, ADUN Serembu Miro Simuh sereta bala ketuai ari mayuh bengkah serakup. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads