Sebuah muzium digital mujur dibuka ba Bario seraris enggau juluk KM - Berita Iban Online

Header Ads

  • Baru Nyadi

    Sebuah muzium digital mujur dibuka ba Bario seraris enggau juluk KM

    BEJADI: Douglas Uggah bejadika muzium digital komuniti Bario.

    MIRI: Seraris enggau perambu Kepala Menteri (KM) Datuk Patinggi Abang Johari Tun Openg deka mai transformasyen ekonomi Sarawak ngagai ekonomi digital enggau teknologi kreatif, seraban pemansik Fakulti Seni Gunaan dan Kreatif (FSGK) Universiti Malaysia Sarawak (UNIMAS) mujur muka sebuah muzium digital di Bario.

    Sapit Dekan Pekara Nembiak enggau Alumni FSGK ke lalu nyadi Ketuai Pemansik Dr Yakup Mohd Rafee madah pengawa muka muzium nya datai ari asil pengawa ngaduka kod enggau dokumen semua asil pansik batu megalith di tanah tinggi Kelabit nya.

    Nitih ku iya, pengawa ngadaka muzium tu datai ari peminta raban Serakup Rurum Kelabit nya empu laban beratika pengulih asil dokumentasyen pansik ti dipejalai sebedau tu nguing ngagai digital.

    “Tua nyadi awak bekunsi enggau bala komuniti Kelabit sereta pengusung meda pesaka asal ke bisi ditu.

    “Berindik ari Bario tu jauh ari indu mengeri, nadai salah kitai ngena digital enggau teknologi dikena muka besai agi pintu penerang ngagai orang luar.

    “Nya alai, pekara ti dibantaika kami nengah teknologi, video enggau gambar ulih ngemai bala bukai meda baka ni pansik dipejalai,” ku iya lebuhka dirandau ba Pengawa Bejadika Muzium Digital Bario rambau Pesta Nukenen 2017 apin lama ke udah.

    Muzium nya udah dipenyadi Sapit Kepala Menteri Sarawak, Datuk Amar Douglas Unggah Embas.
    Inisiatif bekenaka teknologi baka gambar enggau video tu ngemai bala bukai ulih bekunsi di internet enggau laman rama.

    Kenu ku Yakup, FSGK mega meda pengulih seni visual megai pangku pengawa meri pun penerang bekaul enggau ekologi enggau geologi ngagai bala bukai nengah chara muntang agi dimereti.

    “Ari bekenaka visual ngasuh iya kretif sereta rumpas agi ba pengawa meri penerang ngagai bala bukai.

    “Chara tu nyangka kelalu akademik, bisi maya enda dimeretika sekeda piak,” ku iya.

    Ku Yakup nerang, dalam dunia teknologi tinggi kemaya hari, pengawa naburka penerang enda agi bepanggai ba chara lama, ke alai semua iya dalam konteks teks tauka bup.

    “Dikena nyadi siti digital ekonomi ti ngerembai mansang, kitai patut naka ulih beambi ulih ba pemaik teknologi nya memanah.

    “Nengah medium digital ti dikena kami, orang luar ulih nerima enggau macha penerang tumu agi.
    “Pemisi pengawa mantai ngena chara interaktif enggau bekenaka teknologi tu ulih dikena mensia mayuh nemu penyelai Bario nya empu,” ku iya.

    Pekara ti narit ati bekaul enggau muzium digital tu iya nya raban pemansik mantaika monumen beguna endar ngagai Bario dalam kontek 360 darjah.

    Bemacha limpir gambar diambi enggau dichura ngambika muntang agi bala bukai ti deka nemua gaya langkar batu megalith ke bisi dia.

    Diatu, semua penerang ti udah nyadi dokumentasi tau dipeda nengah laman YouTube.

    Ku Yakup nambah, dudi hari, raban pemansik deka ngaga website khas dikena mantaika penerang bekaul enggau batu-batu bisi sejarah nya.

    Kelimpah ari nya, Yakup madahka komuniti Kelabit dia chukup kaya enggau main asal ti agi bisi dikemeran dataika sehari tu.

    “Nya alai, sida patut temegah ati sereta ngena semua penerang ti diulih kami nyadika malin sida dudi hari.

    Pansik ti dipejalai pengelama setaun berengkah ari bulan Ogos taun nyin tadi udah ngemai raban pemansik nyerungkai penyelai empat batu bisi sejarah di tanah tinggi Kelabit nya.

    Raban pemansik ti bisi ngaul diri datai ari bala pengelicha enggau nembiak ngambika pelajar di FSGK UNIMAS. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads