Sediaka kereban bacha digital ba Pusat Sumber sekula - Berita Iban Online

Header Ads

  • Baru Nyadi

    Sediaka kereban bacha digital ba Pusat Sumber sekula

    KOTA SAMARAHAN: Pusat sumber di tetiap sekula di nengeri tu diperansang nyendia kereban bacha digital , ku Kaban Parlimen(MP) Kota Samarahan Rubiah Wang.

    Ku iya, pekara nya seraris enggau pemansang teknologi digital ke alai Perpustakaan Negara Malaysia (PNM) bisi nyendia kereban bacha digital enda bebayar nengah website.

    “Seraris enggau pengerembai teknologi kemaya hari, kitai meseti ngumpul kereban bacha digital ba tetiap pusat sumber ba tetiap sekula.

    “Servis U-Pustaka bisi mega nyendia servis ngiga sereta nginjau bup chara online lalu dianjung terus ke rumah,”ku iya.

    Iya mansutka penerang nya nengah teks ke dibacha Residen Pelilih Samarahan Brahim Lumpu ba pengawa nyuaka Anugerah Nilam Renggat Nengeri Sarawak 2017 di Dewan Suarah ditu, kemari.

    Rubiah nambah, kelimpah nyendia kereban bacha, bengkah kereban bacha mega ulih matak pengerindu macha ba diri raban nembiak sekula.

    “Kelimpah pusat sumber sekula, komuniti sereta ruang bilik mega ulih mantu nyendia kereban bacha lalu dikearap deka mantu nerenak pengerindu macha ba diri nembiak.

    “Tu mih peluang kitai nitihka singkang pengerembai teknologi lalu ngembing bala anak kitai nuju jalai ke positif,’ku iya.

    Iya mega madah kepala pengajar meseti meransang bala nembiak sekula ngambika rindu macha, nambah penau sereta pengelandik kelimpah ti ngulihka penerang chara formal tauka enda formal.

    Ba pengawa kemari, Brahim bisi nyuaka ‘Anugerah Nilam’ Renggat Nengeri Sarawak 2017 ungkup pemenang kategori Sekula Primari Bahasa Melayu, Sekula Primari Bahasa Inggeris, Sekula Sekondari Bahasa Melayu enggau Sekula Sekondari Bahasa Inggeris. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads