Sekula palan nentuka nembiak ulih nyapai pemujur. - Berita Iban Online

Header Ads

  • Baru Nyadi

    Sekula palan nentuka nembiak ulih nyapai pemujur.

    Tanggungpengawa sekula dikena ngiri penemu ngagai nembiak ti ulih nyungkak pemansang menua.

    SRI AMAN: Sekula megai tanggungpengawa beguna endar dikena nyapai juluk menua kelimpah nyadi palan ngagai nembiak ngiri penemu ti tau nempa mayuh agi peranak ke mujur sereta ulih gawaka langkar pemansang menua.

    “Taja pia, pengawa tu meseti nerima sukung enggau kerejasama rat ari semua kelebih agi bala pengajar, Gerempung Apai Indai enggau Pengajar (PIBG) sereta komuniti di tetiap kandang menua nya,” pia ku Menteri Muda Pengelantang Komuniti Sarawak, Datuk Francis Harden Hollis.

    Nitih ku iya, dalam jeman tu bemacham pekara tau nyadi ngagai kitai ke alai pemansang teknologi arus pemadah enggau penyambung (ICT) nempa fenomena globalisasi ‘Dunia Tanpa Sempadan’.

    “Nentuka seruran ulih ngasaika pengelantang lebuh ti napi pemar dunya tu, kitai patut nyedia sereta nyikap bala nembiak ngena bemacham penemu, pengelandik tinggi ti inovatif, ngembuan pemanah ulah ba pengawa nambahka penau rebak baru napi ubah ngena penyikar,” ku iya.

    Iya ke mega Kaban Kunsil Nengeri (ADUN) Simanggang mansutka jaku nya lebuh bejaku bejadika Pengerami Makai Lemai PIBG Sekula Primari (SK) Melugu, Sri Aman 2017 bepalan di Balai Suarah, Sri Aman semak ditu, malam Hari Enam.

    Ku iya, dikena ngenegapka bemacham penemu, penau berandau kelebih agi dalam Jaku English sereta ngiri bemacham pengelandik ngagai bala nembiak nyadi agenda besai di sesebuah sekula.

    Taja pia ku iya, pengawa nguasa penemu enggau penegap aja enda chukup nyema pekara pemanah ulah enda nyadika lalau. Pemanah ulah tu deka nunjuka jalai sereta nyadi lalau laban nyadi pun ulah ti menuku dikena idup di dunya mayuh pemar tu.

    Ku Francis nampung silik agi, pemansang modal mensia tu patut dikerandau ngena chara ti patut sereta begempung. Semua penau enggau pengulih bala nembiak ulih dikemansang enggau efektif.

    “Kitai enggai ngadaka ‘ulat bup’ ti semina nyulut ba akademik aja, tang rebak baru ti sebela pemansang ari sukut batang tubuh, runding, ulah enggau intelektual, bisi disiplin diri ti tinggi, gap gaya, talukka menua sereta nadai ngembuan ulah individualistik sereta ulih megai pangku pengawa dalam komuniti.

    “Pengawa tu seriris enggau dua ari enam teras strategik Pelan Induk Pembangunan Pendidikan (PIPP) iya nya ngadaka menua bansa enggau ngemansangka modal mensia. PIPP nyadi pelasar pemadu manah dikena mansang nuju juluk perintah nyapai status menua mansang datai ba taun 2020,” ku iya silik.

    Nya alai, kaul pengawa tegap antara sekula enggau PIBG deka nempa sekula bisi aspirasyen agi ngangkatka pemanah penyapai akademik enggau kokurikulum nembiak ngambika terus nyulut sereta ulih nambahka agi pengawa ngaul diri enggau penau bala apai indai sereta bala komuniti ngagai sekula. Kaul rat enggau manah tu deka ngemanahka agi rampa belajar ti kondusif, pemaik iya pulai ngagai bala nembiak,” ku iya.

    Berebak enggau pengerami lemai nya, Harden mega bisi ngemendarka agih belanja penyampau RM30,000 ngagai PIBG sekula ungkup taun 2017 dikena bejalaika aktiviti sepanjai taun sida.

    Sama bisi datai Residen Bagi Menua Sri Aman Indit Bangai, Kepala Pengajar Loius Aom, Chairman PIBG Sekula Majeng Kasin, Pemesai Opis Pekara Khas (JASA) Sarawak DUN Bukit Begunan, Jesi Bintoh sereta kaban exco PIBG sekula ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads