Header Ads

  • Berita Tebaru

    Seraban nembiak, penglicha IPG Rajang udah nemuai seraya belajar ke Pontianak

    GAGA BETEMU: Tuan Direktor IPGK Rajang, Dr. Lambat Anak Lindong bejaku ba Universitas TanjungPura.
    PONTIANAK: Seraban nembiak kus Jaku Iban ke benung belatih ba IPG Kampus Rajang udah mujur nemuai ngagai menua Pontianak di Indonesia.

    Penyampau sida ke nemuai nya bisi 31 iku, iya nya 19 iku nembiak diiring 12 iku pengelicha nyengkaum Direktor IPG Kampus Rajang empu, Dr Lambat Anak Lindong.

    Penemuai sida nya pengelama empat hari tiga malam belabuh ari 15-18 Oktober 2017 tu tadi. Sekeda ari endur ke bisi dilawa sida iya nya Fakultas Keguruan & Ilmu Pendidikan (FKIP), Universitas Tanjungpura.

    Lebuh ke nemuai ngagai Universitas, penatai sida seraban endang disambut enggau manah. Tuju penemuai nya ngambika bala nembiak enggau pengelicha ulih bekunsika penemu sereta ngulihka penerang senentang sistem pelajar di menua luar.

    Nembiak ulih mandingka sistem pelajar ba menua nya enggau ba menua kitai lalu aspek ke manah tau diaplikasyen ba menua kitai.

    Penemuai nya mega siti chara ti manah dikena ngerapitka kaul entara dua menua di Pulau Borneo tu seriran enggau konsep 1 Borneo.

    Dr Harida, pengari Dekan Universitas Tanjungpura nya madahka sida berasai temegah ati nerima penatai temuai ari menua bukai ke Universitas, lalu ngarapka ulih ngaga program begulai bekerejasama IPG Kampus Rajang dudi hari ila.

    Penemuai sida nya ukai semina deka ngelawa Universitas Tanjungpura tang mega deka meda daya idup orang di menua nya kelebih agi Bansa Dayak ke bisi diau di menua nya.

    Nya alai, sida milih menua Pontianak laban menua nya diuan mayuh raban bansa Dayak baka Dayak Kanayat’n, Dayak Simpang enggau Dayak Jangkang.

    Sida bisi ngelawa rumah panjai baka Rumah Radakng enggau Rumah Betang ti alai Dayak Kanayat’n diau dulu menya. Kelimpah ari nya, sida mega bisi ngelawa monumen Tugu Khatulistiwa ti endang nyadi ke lambang sereta penarit ati orang nemuai ke Pontianak.

    Hari ti ke penudi, sida nemuai ngagai Muzium Kalimantan Barat ti bisi mandangka mayuh bansa kereban asal ti dikena raban bansa Dayak di menua nya ngidupka diri dulu kelia.

    Ari nya tadi, nembiak ulih beratika gaya pendiau lalu bekaulka daya idup bansa Dayak di Kalimantan enggau bansa Dayak di menua kitai.

    Mayuh kereban ke bekaul enggau adat sereta pengarap lama ke enda kala dipeda nembiak bisi ba muzium nya.

    Nembiak ulih meda penyama enggau bida daya idup enggi sida enggau enggi kitai laban penemu tu endang beguna sereta bekaul enggau Kus Jaku Iban ke diambi sida.

    Pengawa nemuai ti baka tu manah bendar dikena meri penemu tambah ngagai nembiak ke benung belatih tauka belajar ngambi kus bekaul enggau jaku sereta daya idup bansa Dayak. Pia mega pengawa nemuai tu tau dipejalaika enggau belebuh dikena meransang pengeransing ati bala nembiak ke benung besekula tauka belajar ba institut pelajar tinggi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: