Header Ads

  • Berita Tebaru

    SJK (C) Chung Hua No.4 deka dipindah, digaga besai

    AGIH: Abang Johari enggau bini iya Datin Patingi Dato Juma’ani Tuanku Bujang nyuaka replika chek ngagai siku pengari sekula. Bela dipeda Azmi (dua kiba).
    KUCHING: Sekula China, SJK (C) Chung Hua No:4 di Jalai Haji Taha, di entara sekula di sitak Satok ke deka dipindah sereta digaga besai agi.

    Kepala Menteri Datuk Patinggi Abang Johari Tun Openg madah, inisiatif nya deka di keamatka, enti udah bisi tanah endur ngaga sekula nya, tang pemutus nya bepanggai ba Raban Kaunsil Direktor (BOD) sekula nya empu.

    “Kami duai Kaban Parlimen (MP) Petra Jaya, Dato Sri Fadillah Yusuf benung ngiga tanah ke engkeman endur ngaga baru sekula nya di Kuching, tang sebarang pemutus, besetuju tauka enda, bepanggai ba (BOD) sekula nya,” ku Abang Johari.

    Iya madah munyi nya lebuh bejaku ba atur pengawa Nyuaka Bantu Pelajar ari Yayasan Sarawak 2017 di Dewan SK Merpati Jepang ditu, kemari.

    Ku iya, SJK (C) Chung hua No:4 nyau majak sempit, tanah pan mit nyema sida iya deka ngemesaika sekula nya, tang ngamatka projek nya bepanggai ba (Board of Directors) sekula.

    “Diatu pan kami benung berunding enggau BOD enti sida iya deka dipindah ngagai endur bukai (tang pengudah tetemuka endur ke engkeman alai sekula nya),” ku iya.

    Abang Johari ti mega nyadi Kaban Kunsil Nengeri (ADUN) Satok mega madahka baka nya mega enggau sekula St Teresa (di sitak Satok) ke bedau lama tu tadi kena penusah angus, deka digaga baru.

    “Perintah deka ngemansangka sekula-sekula di mengeri tu sebaka pendiau enggau sekula moden ba mengeri,nyengkaum di meua pesisir’” ku iya.

    Ba lansa bukai, Abang Johari ti mega nyadi Menteri Wang enggau Perambu Ekonomi nandu baru madahka dalam pemansang ngangkatka pelajar di menua tu, Perintah Nengeri ninting taun meri ungkup dalam penyampau RM300 juta ngagai Yayasan Sarawak kena sida iya meri sekularsip sereta mantu nembiak sekula ke datai ari ruang bilik kurang pemisi, nyambung pelajar sida iya.

    Berengkah ari bulan September tu tadi, urung 40 iku nembiak ke ngambi kus profesional baka kus Perubat, dianjung besekula di Universiti Malaysia Sarawak (UNIMAS) lalu pengawa bansa tu deka terus dipajak, ku iya.

    “Dalam kandang lima taun, kitai ulih ngelatih 200 iku lutur gawa enggau komuniti menua tu.

    “Perundingka setaun yuran ngambi kus perubat, bisi manggai urung RM500,000. Nyema 40 iku nembiak ke ngambi kus perubat, nya kebuah kitai begunaka mayuh agi ungkup ke pelajar nembiak menua tu.

    “Lalu baka nya mega enggau lun ari Yayasan Sarawak... Nya alai enti kita udah mujur bayar pulai baru ngagai Yayasan Sarawak. Sida iya pan begunaka duit nya kena mantu nembiak bukai,” ku iya.

    Dalam komuniti ku iya, enti kitai deka meda menua ke maju, peratika ulah tauka gaya bala nembiak menua nya.

    “Semua pupu bansa sereta pengarap betatika anak sida iya orang ke puh besekula,” ku iya.

    Ba atur pengawa nya kemari, 125 iku nembiak ari sekula primari nerima perengka guna besekula, lalu penerima nya nyengkaum nembiak ari SK Merpati Jepang, SJK (C) Chung Hua No:4 Jalai Haji Taha, SK St Thomas, SK St Mary, SK St Joseph, SK Combined enggau SK Rakyat.

    Bisi 14 iku nembiak ari sekula sekondari pan nerima bantu ke sebaka, iya nya SMK St Joseph, SMK St Thomas, SMK St Mary enggau SMK Sg Maong.

    Sebedau nya, Direktor Yayasan Sarawak, Azmi Bujang madah tu taun ke-35 Yayasan Sarawak meri bantu perengka guna kena besekula ngagai nembiak sekula di serata menua, nyengkaum nembiak ke diau di menua pesisir.

    Bantu nya kemari, diberi nengah baucher ke berega RM200 ungkup siku nembiak, alai sida iya ulih meli baju sereta kasut sekula ari bantu nya.

    Taun tu ungkup kena mantu nembiak sekula bebelika barang sekula sida iya ke diberi perintah menua ku iya, bisi udah nambah ari RM2 juta ngagai RM4 juta, lalu baucher ke dichelak dalam 20,000 iti, alai 19,000 disadung nengah ADUN ba sitak sida iya empu.

    “Tukar baucher kita enggau kedai ke nerima baucher nyual perengka guna kena sekula, lalu kena baucher nya sebedau 30 November taun tu,” ku iya.

    Lalu baka nya mega enggau sekularsip ke diberi ninting taun, ngagai nembiak sekula kelebih agi bala nembiak ari menua pesisir (ke patut dibantu), alai Yayasan Sarawak ngungkupka RM300 ungkup siku nembiak Pom 1 ngagai Pom 3 sereta RM500 ungkup siku tubuh nembiak Pom 4 ngagai Pom 5.

    Sama bisi ngulu atur pengawa nya kemari, bini Kepala Menteri, Datin Patinggi Dato Juma’ani Tunku Bujang, Sapit Sekretari Perintah Menua, Datu Sabariah Putit, enggau Sapit Chairman Yayasan Sarawak, Datu Abu Bakar Marzuki. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: