Header Ads

  • Berita Tebaru

    Skim belanja mikro AIM mayuh meri pemaik ngagai pesereta

    MANAH: Awang Tengah bejalai meda siti ari bansal AIM Lawas.
    LAWAS: Peranak Sarawak ti nerima skim belanja mikro Amanah Ikhtiar Malaysia (AIM) entara orang ti pemadu betuah laban nengah skim nya sida bisi pengelebih ari sukut mayar pulai, ngelui ari tikas nasional.

    Sapit Kepala Menteri enggau Menteri Pemansang Mengeri Enggau Pengeraja Asal Kedua Datuk Amar Awang Tengah Ali Hasan mansutka pekara tu rambau bejadika pengawa muka Amanah Ikhtiar Malaysia (AIM) pampang Lawas, Palan Transformasyen Bejait (STC) enggau gempuru raban pedagang di Taman Awam Lawas, kemari.

    “Penyampau bpulai lebih ari 99 peratus ti semak enggau rikod manah,” ku iya muji disiplin kredit jali penerima di nengeri.

    Sarawak bisi 17 iti pampang AIM enggau kumulatif RM 1.1 bilion belanja kredit, naka bulan Ogos taun tu ngaul 42,688 iku penerima, ke alai 37,680 iku aktif.

    Tagit belanja AIM RM239.692 juta ungkup taun 2017, enggau pampang Lawas diungkup nyauka RM14 juta ungkup pesereta AIM taun tu, mai kumulatif manggai RM41.8 juta.

    Awang Tengah, ke mega Menteri Industri enggau Pemansang Pengawa Dagang, meri puji disiplin kredit jali penerima di Sarawak laban ngamatka semaya bayar pulai sida lalu nentuka orang bukai ulih nerima bantu dalam skim nya.

    Ku iya, perintah nengeri ngenang pemanah pangku pengawa AIM ti ngenegapka rayat nengah akses dagang besai, latih enggau iring dalam aktiviti ekonomi dikena nambahka penatai pemisi ruang bilik.

    “Aku empu udah meda bisi orang seranta penerima bantu ninting bulan ari opis pengintu pengelantang teulihka pemujur, mansutka diri ari penyeranta enggau bantu ari AIM,” ku iya.

    Pesereta Skim AIM udah ngayanka chunto disiplin kredit ti patut ditunda sereta begulai enggau pemanah pengawa staf ngujungka AIM diberi anugerah Best Islamic Microfinance Institution ungkup lima taun berunggu kenyau ari taun 2013, diakun di baruh Global Islamic Finance Awards.

    Awang Tengah mega nyukung pengawa numbuhka Kelab Wanita Ikhtiar Lawas enggau ngelancharka Palan Transformasyen Bejait ba Lawas, ngemendarka geran RM80,000 enggau RM50,000 dikena ngepunka program sida.

    Ku iya, perintah Sarawak mega udah nyediaka Medan Niaga di Lawas enggau Anjung Usahawan di Merapok nyadika palan ungkup pedagang di menua nya bedagang, ngansak komuniti dia ngerebut peluang nya.

    Ku iya, perambu Palan Pengumpul Lawas di pelilih deka nyadi katalis ke bukai ungkup komuniti di menua nya ngaul diri ba pemansut barang ti ulih dijual di menua tu enggau dalam makit antarabansa nengah E-Dagang.

    Antara produk iya nya kraf jari enggau produk ti nyelai di Lawas.

    Dulu agi ari nya, Chairman Eksekutif AIM, Dato Dr Zubir Harun dalam jaku pengelalu iya madahka pesereta pampang Lawas nyadi antara pemanah penguna mikro belanja AIM, enggau penyampau bayar pulai 98.44 peratus.

    Ku iya, skim tu dibaruh perintah BN patut dikenang komuniti menua tu laban iya pulaika penguntung.

    Iya ngarapka tu deka dibalas enggau pemenang BN maya pengawa bepilih besai ti deka datai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: