Header Ads

  • Berita Tebaru

    Smart fokus muka stesyen minyak di menua pesisir

    STESYEN MINYAK SMART DEKA DIGAGA DI MENUA PESISIR: Awang Tengah (dua kiba) meri penerang pasal Stesyen Minyak Smart. Sama bisi dalam gambar, Osman (kiba), Tan (kanan) enggau Liaw (dua kanan).
    Smart Stream Resources ngarapka nya ila ulih meransang dagang lalu ngangkatka ekonomi komuniti menua pesisir.

    KUCHING: Dua puluh buah stesyen minyak deka tauka benung digaga Smart Stream Resources kelebih agi ba kandang menua pesisir.

    Smart Stream Resources sebuah kompeni ari Semenanjung Malaysia ngemerat pengawa ngaga stesyen minyak mini tu, ngambika ulih meri pengelantang ngagai komuniti menua pesisir ngulihka bekal petroleum ba rega, kuantiti sereta kualiti ke sebaka enggau di mengeri.

    Sapit Kepala Menteri Datuk Amar Awang Tengah Ali Hasan madah, stesyen minyak nya ila deka nyendiaka perengka guna baka palan endur belelak sereta muka peluang dagang enggau pengawa puang dikena meransangka pengawa dagang sereta ngangkatka sosio-ekonomi komuniti menua pesisir.

    “Diatu, peyampau peminta deka muka stesyen minyak ari baruh Smart Stream Resources tu bisi 20 iti peminta ke alai ari penyampau nya, dua benung digaga lalu 8 iti peminta agi dalam proses lalu laluh 10 buah agi benung ngiga palan ke engkeman endur muka stesyen minyak nya.

    “Tu siti pemansang ke manah endar dikena kitai mantu komuniti ke diau di menua pesisir,” ku Awang Tengah.

    Iya madah munyi nya lebuh bejaku ba aum media pengudah nyadi chairmanka Aum Bejuraika Pekara bekaul enggau Koperasi Nengeri Sarawak (MPKN) Bil.1/2017 di sebuah hotel ditu, kemari.
    Dua buah stesyen minyak baruh ke sisebut iya benung digaga nya, iya nya di Tanjung Manis ke dipelaba tembu dalam bulan Februari 2018 lalu sebuah agi di Stapang (Sibu) ke deka dibuka dalam bulan Februari 2018.

    Lapan buah stesyen minyak Smart Stream Resources ke dalam proses digaga, iya nya di Jalai Julau/Entabai (Julau), Meradong, Belawai, ba palan Gerempung Orang Berikan di Pusa, Simpang 4 Nyabor (Kabong) enggau Jalai Sg Maaw (Sibu).

    Di Semenanjung Malaysia, Smart Stream Resources udah muka stesyen minyak sida di Kpg. Kuala Medang, Kuala Lipis (Pahang), Felda Sungai Panching Selatan, Kuantan (Pahang), Kpg Baru Salong, Pekan (Pahang), Felcra Sri Makmur, Pekan (Pahang), Felcra Gugusan Pahang Tenggara, Kpg Baru, Salong, Pekan (Pahang), Felda Mayam, Bera (Pahang), Felda Jenderak Utara, Kuala Krau (Pahang), Felda Keratong 2, Muadzam Shah (Pahang), Felda Sungai Behrang, Slim River (Perak), Felda Mengkawang, Ajil (Trengganu), Felda Chemomoi, Spg Pelangai, Bentong (Pahang), Felda Chini Timur 1, Pekan (Pahang).

    Sebedau nya, Direktor Besai Smart Stream Resources Sdn Bhd, Mohd Khairuddin Saimon madahka stesyen minyak nya diempu 100 peratus Bumiputera tu, enda sebaka enggau Petronas, Shell, tauka chap bukai lalu stesyen minyak Smart Stream Resources Sdn Bhd bisi chap kediri empu.

    “Kami enda sama chap enggau nama kompeni besai bukai baka Petronas Shell enggau ke bukai, tang Smart tu ngatika diri.

    “Tagit kami ke taun tu enggau taun baru tu ila, kami ngarapka ulih ngaga 45 unit stesyen minyak Smart di menua pesisir,” ku iya.

    Sama bisi enggau ngulu aum media nya kemari, Direktor Suruhanjaya Koperasi Malaysia (pampang Sarawak)Osman Ismail, Direktor Opis Menteri Dagang, Koperasi enggau Pekara Bebeli Barang, Dato Stanley Tan enggau Sekretari Mendam, Opis Menteri Pemansang Orang Dagang enggau Industri, Datu Liaw Soon Eng. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: