SUPP udah dikemendar bediri ba tujuh penuduk maya PRU14 - Berita Iban Online

Header Ads

  • Baru Nyadi

    SUPP udah dikemendar bediri ba tujuh penuduk maya PRU14

    ANDAL MENANG: Dr Sim (tengah) sereta bala raban SUPP ngelai Penyerami Ngintu Kuih Bulan ba Sekula Sekondri Citizen, Stabau di Sibu, malam ensana.

    SIBU: Parti Sa’ati Rayat Sarawak (SUPP) udah nerima ‘pemendar’ ari pemesai Barisan Nasional (BN) bediri ba tujuh iti penuduk ti endang enggi sida ngelama tu maya Pengawa Bepilih Besai (PRU) Ke-14 ti deka datai.

    SUPP ari suba bediri ba penuduk Parlimen Sibu, Lanang, Miri, Serian, Kuching, Stampin enggau Sarikei.

    Presiden SUPP Datuk Dr Sim Kui Hian madah, ba aum besai empat bengkah komponen parti BN begulai enggau Kaban Kaunsil Besai BN Menua enggau chairman BN menua enggau nengeri kena 8 September tu tadi udah besetujuka SUPP mengkang dikeandal ngetanka penuduk sida maya bepilih serak tu.

    “Chairman BN nengeri mega udah besetuju enggau pekara nya.

    “Tu ukai aku nyebut, Kepala Menteri empu besetujuka pekara nya laban pemutus endang ari jaku Chairman BN Menua iya nya Menteri Besai.

    “Nya alai, nitihka pemutus aum nya, kami mengkang bediri ba tujuh bengkah penuduk ba PRU tu,” pia ku iya madah.

    Iya mantaika pekara nya ba mua lebih 2,000 iku mensia mayuh maya Penyerami Ngintu Kuih Bulan ba Sekola Sekondri Citizen, Stabau, malam ensana.

    Bela datai maya tu iya nya Sekretari SUPPP ti mega Kaban Kunsil Nengeri (ADUN) Meradong Datuk Ding Kuong Hing, Sekretari Politik Kepala Menteri Michael Tiang, Chairman SUPP Pampang Dudong Datuk Dr Soon Choon Teck, Coordinator BN Parlimen Lanang Chieng Buong Toon, Coordinator BN Parlimen Sibu Kaunsilor Robert Lau, Chairman Opis Kaunsil Menua Pesisir (SRDC) Kaunsilor Sempurai Petrus Ngelai, tiga iku ‘manuk sabung’ SUPP ungkup Parlimen Lang Kelvin Kong, Kaunsilor Joseph Chieng enggau Wong Ching Yong sereta bala raban parti nya ke bukai.

    Sim ti mega Menteri Perintah Kandang Menua enggau Pengawa Berumah madahka sebedau tu iya kala mantaika pekara nya tang bisi piak sengaja nempa cherita ketegal ngira penguntung politik diri.

    Iya madah, iya semina mantaika pemutus ke digaga maya aum empai lama tang ukai pemutus ke digaga iya empu.

    Ba pekara bekaul, iya madahka diri andal BN mujur ngambi pulai penuduk Parlimen Lanang serak PRU14 tu.

    “Lanang udah dudi lima taun ari penuduk ke bukai ti dipegai BN ba pekara pemansang ketegal dipegai penyakal.

    “Bisi pengurang ulih dipeda ti meseti diaduka kitai.

    “Pengurang ke nyengala diasaika diatu baka penanggul telekomunikasi ba endur kitai berami sehari tu (ensana),” ku iya sambil madahka diri bela andal mujur ngambi Parlimen Sibu.

    Berindik ari nya, Sim minta rayat di parlimen Lanang nguingka sukung sida ngagai BN lalu nyukung chalun SUPP maya PRU tu laban semina BN aja ulih ngangkatka pengidup rayat.

    Dulu agi ari tu, Kelvin ba jaku pengelalu iya madahka diri deka ngemeratka empat bengkah isu di Lanang baka penusah ampuh bah, penanggul ba servis pengerai, suntuk balai mensia mayuh, penanggul telekomunikasi/internet kelimpah deka numbuhka zon industri nyema dipilih nyadi pengari rayat ba Parlimen Lanang.

    “Isu tu patut diaduka dulu ari pekara bukai laban tu dipeda bekaul amat enggau pengelantang pengidup rayat ditu,” pia ku iya madah.

    Ba pengerami nya, Dr Sim bela bisi nyuaka pemeri ari perintah ngagai beberapa bengkah sekula China ditu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads