Suspek masung uchu tiri parai pagi kemari. - Berita Iban Online

Header Ads

  • Baru Nyadi

    Suspek masung uchu tiri parai pagi kemari.

    SRI AMAN: Seiku orang bumai bekebun ti beumur 54 taun ke nemu diri digiga polis ketegal disangka masung uchu tiri, mutus ati munuh diri ngirup rachun indu utai.

    Ketua Jabatan Siasatan Jenayah Sarawak Datuk Dev Kumar madahka, orang ke disangka nya ditemu urung pukul 11 malam ensanus ba langkau umai iya empu di Sembayang ditu, ti nyau enda tentu nemu diri sereta mulut bepupu.

    Nitihku Dev, orang ke disangka nya tekala nya ditabanka ngagai Sepital Sri Aman sereta dipadahka mati urung pukul 5 pagi kemari sebedau sempat dianjung berubat ke Sepital Besai Sarawak, Kuching.

    “Dipelabaka orang ke disangka nya nemu diri digiga sereta deka ditangkap polis laban enti ditemu salah masung ulih kena ukum jil 20 taun ngagai 30 taun. Engka nya iya mutus ati munuh diri lalu ngirup rachun indu utai,” ku Dev nengah sebengkah penerang berita kemari.

    Nitih ti dipadahka, orang ke disangka nya masung uchu tiri iya ke beumur urung 14 taun dua kali dalam bulan Ogos tu tadi lalu ngujungka indu nya betubuh bisi.

    Indu nya ti deka ngelalaika pekara nya dipadahka nguji munuh diri terejun ari ringkat satu asrama sekula sida urung pukul 2.30 lemai kena 21 September apin lama.

    “Indu nya diperubatka ba Sepital Sri Aman sereta udah nya ditemu betubuh bisi tang nadai nusui penusah diri ke udah kena leman.

    “Kena 27 September tu tadi, indu nya bisi madah diri dileman aki tiri iya ngagai seiku pegawai perubat ke ngubat iya,” ku Dev.

    Berengkah ari nya riput polis bekaul enggau penusah nya digaga pegawai rama perubat nya ba hari ke sama.

    Bepelasarka penerang ke diberi indu nya Ku Dev, penusah keterubah nyadi urung pun bulan Ogos maya orang ke disangka ngambi indu nya pulai ke rumah maya ujung minggu ari asrama lalu maya nya orang ke disangka nya mai indu nya ngagai sebuah langkau kebun kelapa sawit iya lalu masung indu nya.

    Kali kedua nyadi seminggu udah nya ba sebuah rumah panjai di Sembayang ke alai indu nya dileman ba bilik besai maya sida sebilik ke bukai benung tinduk, ku Dev. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads