Tanggungpengawa SRS diaku nyadi raban penagang penyalah. - Berita Iban Online

Header Ads

  • Baru Nyadi

    Tanggungpengawa SRS diaku nyadi raban penagang penyalah.

    SRI AMAN: Tanggungpengawa Komiti Rukun Tetangga (KRT) dalam nyaga pengelikun udah diangkat manah agi pengudah Skim Penginau Volunteer (SRS) diiaku sereta dikelaku nyadi sebengkah ari raban pengereja pengawa dalam inisiatif ‘Bidang Keberhasilan Utama Negara’ (NKRA) dikena ngenegapka pengelikun enggau mutarka pengawa jai.

    Menteri Muda Pengelantang Komuniti Sarawak, Datuk Francis Harden Hollis madah, tuju SRS deka bekerjasama enggau Polis Diraja Malaysia (PDRM), Opis Volunteer Malaysia (RELA) sereta piak Kaunsil Kandang Menua (PBT).

    Ku iya, dalam Akta Rukun Tetangga 2012 terang amat madah pasal SRS tu, Seksyen 15 nyentuk Seksyen 21 bepun ari pejalai pengawa SRS, tanggungpengawa skim tu nyengkaum nginsil SRS.

    “Aku andal kaban SRS diberi penerang pasal pekara tu maya kus pemungkal SRS lalu nyema bisi sebarang penanggi; ulih betemu terus enggau Opis Penyerakup Bansa enggau Menua (JPNIN) Bagi Menua Sri Aman ke ngatur skim tu,” ku iya.

    Kaban Kunsil Nengeri (ADUN) Simanggang nya madah munyi nya rambau bejadika Kus Pemungkal SRS enggau Penginau Begulai enggau Ketuai KRT Bagi Menua Sri Aman diatur JPNIN Bagi Menua Sri Aman sereta Komiti Penyerakup KRT Bagi Menua Sri Aman bepalan ba Gelanggang Futsal Rancangan Perumahan Rakyat (RPR), Taman Sentosa Indah ditu ensanus.

    Iya mega madah, pengelikun enggau pengelantang komuniti endang sebengkah tanggungpengawa ke besai dipejalai dalam napi pemar enggau isu kemaya hari, pengelantang ke diasai nya patut bela ngetan.

    “Komiti Rukun Tetangga (RT), penginau SRS nyaup nentuka pengelikun menua nengah pengawa komuniti ba renggat KRT diri. Taja iya dipeda mit tang chukup besai reti,” ku iya.

    Harden madah, SRS endang sebengkah skim dipinta peranak genturung pendiaau ke ngembuan abis nadai 20 iku penginau beumur 18 taun ke atas.

    “Skim tu dipenyadika kena 21 Februari 2004. Ba bagi menua Sri Aman, SRS keterubah dikemendar iya nya KRT Taman Harmoni Orkid kena 10 November 2009 lalu ke pemadu baru, tiga genturung pendiau iya nya SRS Entebar Batu Lintang, SRS Temudok Atas enggau SRS Taman Sentosa Indah kena 23 Februari 2017.

    “Tu ngujungka SRS ba Bagi Menua Sri Aman bisi 31 SRS ari 53 KRT. Ari penyampau nya 18 ba sitak Kunsil Nengeri (DUN) Simanggang,” ku iya.

    Sama bisi datai ba progrma tu, Pemesai JPNIN Bagi Menua Sri Aman, Fikri Emir Zulkeffli, Pemancha Mas Shamsiah Maslem, Penghulu Abdul Samad Abdul Rahim sereta ke bukai.
    Berebak enggau nya, Harden bisi nyuaka setipikit nyiri SRS ke baru ngagai SRS Entebar Batu Lintang, SRS Temudok Atas enggau SRS Taman Sentosa. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads