Tentuka haribulan ngatur pengawa enda besibil enggau program bukai. - Berita Iban Online

Header Ads

  • Baru Nyadi

    Tentuka haribulan ngatur pengawa enda besibil enggau program bukai.

    NGEPUNKA ATUR PENGAWA: Uggah malu tawak ke nyadi kelai atur pengawa pemandang Pengawa Dagang enggau Karnival Pengguna 2017 renggat Betong dipunka, lalu bela dikemata ulih bini Uggah, Datin Amar Doreen Mayang (dua kanan), Rentap (tiga kanan) sereta sekeda temuai bukai.

    BETONG: Sida ke ngaga pengawa pemandang Pengawa Dagang sereta Karnival Pengguna renggat Betong di asuh mansik baru hari bulan ke patut ngatur atur pengawa nya, ngambika ulih matak mayuh agi temuai ari luar datai ngagai kandang menua nya.

    Sapit Kepala Menteri Datuk Amar Douglas Uggah Embas madah, enti nitih, mayuh bagi menua bukai dalam bulan September bela ngaga program sereta pengerami.

    “Mayuh bengkah bagi menua di nengeri tu, dalam bulan September ngaga mayuh macham aktiviti sereta program baka regata enggau karnival.

    “Nya alai, aku ngelalau ngagai sida ke ngatur program mansik baru hari bulan kita ke ngaga pengawa pemandang ke renggat Betong, ngambika ulih matak mayuh agi temuai, alai kitai aja ke ngaga program maya nya,” ku iya.

    Iya bejaku munyi nya lebuh ngepunka program Pengawa Pemansang Peangawa Dagang sereta Karnival Pengguna 2017 renggat Betong ke bela di gulu Kaban Kunsil Nengeri (ADUN) Layar Gerald Rentap Jabu ditu, malam kemari.

    Uggah ti mega nyadi Menteri Pengawa Betanam Betupi Moden, Tanah Adat enggau Pemansang Menua Pesisir madaha, ke sekali tu, atur pengawa nya mujur matai mayuh temuai, iya nya dipelabaka dalam 25,000 nyengkaum pekit Gelar Carta Sapa Juara (ACSJ) bedau lama tu tadi.

    Iya madah, tu mandangka program bansa nya majak nerima timbal ke manah lalu muka peluang dagang ba entara orang dagang ke sama bisi nguluka pengawa pemandang nya.

    Iya nandu baru madahka, iya bisi dipadah Residen Betong, iya nya asil ari utai ke dijual dalam kadang seminggu program nya dipejalai, dipelabaka nyapai enda kurang RM1 juta, iya nya sebaka enggau taun siti nyin tadi.

    Iya madah, iya mega bisi dipadah bisi di entara sida ke bedaja ke bejual maya karnival teulihka penguntung pulai baru datai ngagai RM6,000 seminggu.

    “Tu program ke manah endar lalu kami deka terus nyukung, ngambika atur pengawa ke sebaka bansa tu ulih digaga baru taun baru tu ila, tang aku ngarap, enti ulih, program tu digaga tumu agi ngambika muntang kitai ngiga wang turu kena nyukung program tu.

    “Lalu baka nya mega, aku minta opis sereta ijinsi ke bisi program mantu rayat sama enggau ngulu sereta ngaga perambu tumu agi laban ke sekali tu, aku beratika sekeda (booth) semadi endar gamal, baka ke anang enda meh,” ku iya, lalu nandu baru, kebuah ‘booth’ nya enda digaga enggau manah laban kelalu laun nyendiaka perengka guna nya.

    Uggah ti mega nyadi Kaban Kunsil Nengeri (ADUN) Bukit Saban madahka pengawa ngaga program nya ulih neritka agi penyerakup mayuh macham pupu baansa enggau pengarap di Betong.

    “Program tu nyadi palan ngagai kitai di Betong ke datai ari mayuh macham pupu bansa, pengarap sama-sama enggau ngulu program tu, duduk sama-sama ngambika kitai pan ngelala sereta mereti ati pangan diri.

    “Aku deka meda gaya tu dipajakka ngambika Betong majak likun sereta kitai pan muntang nyapai pemansang,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads