TR patut nyediaka profil genturung pendiau. - Berita Iban Online

Header Ads

  • Baru Nyadi

    TR patut nyediaka profil genturung pendiau.

    RINDU MEDA: Harden (dua kanan) benung bejalai meda pengawa mandang sebengkah ejensi perintah seraya disempulang Richard (kanan) sereta bala bukai.

    Nengah profil tu ulih dikena ngemuntangka pengawa ejensi ti bekaul ngulihka penerang nembiak redak

    SRI AMAN: Menteri Muda Pengelantang Komuniti Sarawak Datuk Francis Harden Hollis minta bala Tuai Rumah (TR) di pelilih menua tu nyediaka profil genturung pendiau dikena ngemuntangka Opis Pengintu Pengelantang Mensia Mayuh (JKM) nemu ni bagi nembiak redak sida di rumah panjai tauka genturung pendiau ti patut nerima bantu nitihka pematut ari opis nya.

    Ku iya, endang patut tetiap rumah panjai tauka genturung pendiau ngembuan penerang kediri empu bekaul profil nembiak redak di baruh pegai sida ti begunaka bantu pengelantang tauka ari ejensi perintah ke bukai.

    “Ari penerang ti disimpan ketuai raban bansa baka tuai rumah enggau ketuai genturung pendiau ke alai muntang agi ejensi bekaul ngenataika semua bantu ngagai peranak ti begunaka bantu,” ku iya.

    Harden ke mega Kaban Kunsil Nengeri (ADUN) Simanggang mansutka jaku nya lebuh bejaku bejadika Program Pemansang Komuniti NBOS diatur Kaunsil Pelilih Sri Aman (MDSA) bepalan di Rumah Kadir, Lepong Simpai semak ditu, pagi kemari.

    Berebak enggau nya, iya mega ngelalau sebarang rumah panjai tauka genturung pendiau ti nadai ngembuan sebarang penerang ngambika ngaga chuan penerang ngambi nyadika lalau dudi hari.

    “Tetiap penerang ke bisi dalam sistem chuan penerang nya ukai semina dikena MDSA aja tang mega JKM, Opis Pelilih, Opis Residen, KEMAS enggau pengari rayat ti begunaka iya.

    “Anang sesekali ngerunding penerang nya enda beguna laban nya deka ngemuntangka pengawa sebarang ejensi perintah lalu deka belalauka nya,” ku iya nyemetak.

    Nya alai, iya dekaka tuai rumah enggau ketuai genturung pendiau patut bejalaika pangku pengawa ngadaka sistem penerang di menua sida empu pengudah tu,” ku iya nandu.

    Sama bisi datai Ketuai Kunsil Opis Pelilih Menua Sri Aman (MDSA), Richard Tawan Sedu sereta bala kaban kaunsil ke bukai.

    Berebak enggau program nya, Harden mega bisi ngemendarka agih belanja penyampau RM5,000 ngagai JKKK lalu RM3,000 da agi ngagai Biro Indu Rumah kadir dikena bejalaika aktiviti sepanjai taun sida.

    Program nya mega dirichah enggau pengawa mandang ari ejensi perintah, pekit ngajat, penchak silat enggau karaoke. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads