UCTS dipinta numbuhka Palan Teknologi Kayu - Berita Iban Online

Header Ads

  • Baru Nyadi

    UCTS dipinta numbuhka Palan Teknologi Kayu

    TEMUAI DIPEBASA: Wong (tengah) begulai enggau Abang Johari (kanan) ba Pengerami Konvokesyen Kedua UCTS di Sibu, kemari.

    Sida tau bekerejasama enggau STIDC sereta STA dalam numbuhka palan nya, ku Abang Johari.

    SIBU: Kepala Menteri Datuk Patinggi Abang Johari Tun Openg merambu ngagai Universiti Kolej Teknologi Sarawak (UCTS) ngambi numbuhka Palan Teknologi Kayu ba pejalai projek pansik enggau inovasyen ti bekaul enggau industri kayu ramu.

    Nitih ku iya, Sibu nyadi hab ungkup industri bepelasarka pemansut sereta bisi sekeda indu opis serikat-serikat besai ba pengawa kayu ramu baka KTS, WTK, Ta Ann, Rimbunan Hijau enggau mayuh ke bukai.

    “UCTS tau bekerejasama enggau pengawa kunsi pintar begulai enggau Serikat Pemansang Dagang Kayu Sarawak (STIDC) enggau Gerempung Kayu Ramu Sarawak (STA) dalam numbuhka palan nya.

    “Tu deka ngasuh kitai ulih nyukung sereta ngangkatka pemanah industri kayu ramu kitai enggau inovatif agi ba pengawa ngemayuhka industri tu dalam makit dunya sereta ulih nyadi pemansut besai ekonomi kitai di nengeri tu dudi hari,” ku iya.

    Iya mansutka jaku nya lebuh bejaku ba Majlis Konvokesyen Kedua UCTS di sebengkah hotel ditu, kemari.

    Sama bisi datai Canselor UCTS ke mega Tuai Pemesai Menua (TYT) Tun Pehin Sri Abdul Taib Mahmud disempulang bini iya Toh Puan Datuk Patinggi Ragad Kurdi Taib, bini Abang Johari Datin Patinggi Dato Juma’ani Bujang, Menteri Wang Kedua ke lalu nyadi Chairman UCTS Dato Sri Wong Soon Koh enggau bini iya Datin Sri Pauline Leong Poh Ling, Menteri Muda Pemansang Dagang Mit enggau Jelan Pemesai (PKS) ke lalu nyadi Menteri Muda E-Dagang Datuk Naroden Majais, Mandal Canselor UCTS Profesor Dr Abdul Hakim Juri.

    Berebak enggau pengawa nya, bisi 198 graduet ari tujuh program/jurusan akademik udah nerima degree sida ari Taib.

    Sida tu datai ari 48 iku graduet ari Bachelor of Quantity Surveying (Hons), Bachelor of Science (Hons) in Architecture (31), Bachelor of Business Administration (Hons) (70), Bachelor of Accountancy (8), Bachelor of Civil Engineering (24), Bachelor of Engineering Technology (Hons) in Electrical and Electronik (14) dan Bachelor of Mechanical Engineering (3).

    Ngian Ek Tee ari Bachelor of Business Administration (Hons) udah nerima Anugerah Canselor seraya Best Student Award diterima Lim Yong Yat dari Bachelor of Civil Engineering (Hons) enggauAmy Natasha Atahar ari Bachelor of Business Administration (Hons).

    Ku Abang Johari, industri kayu patut bejalaika pansik sereta ngadaka kampung gaga ngambika enda seruran bepanggai ba kampung asal.

    Ba pekara Palan Teknologi Kayu, ku iya, tau bejalaika pansik enggau nyukung pengawa ngemai teknologi baru enggau pejalai pemansang industri kayu ari kampung gaga ngambika ulih ditan sereta seruran nyadi ekonomi besai di Sarawak.

    “Aku deka nyukung industri tu ngagai siti ekonomi bepelasarka teknologi pemadu baru ti diperati bisi pengulih nyadi pemansut ekonomi ngagai nengeri tu,” ku iya nampung.

    Ba lansa bukai, iya mega meri pengaga ati ngagai Yayasan Kontraktor Kayu Kayan Sarawak (SFTC) ti udah gawaka sektor pelajar di nengeri tu meri scholarship ngagai bala nembiak.

    “Pengawa meri sholarship ti mayuh ngagai bala nembiak di nengeri tu nadai kala nyadi ba pengawa meri sholarship di Sarawak. SFTC udah besetuju nambahka premium kayu ari 80 sen ngagai RM50 satu meter padu ungkup pelajar di Sarawak.

    “Diatu, kitai ngembuan RM300 juta ungkup pelajar setaun dibanding RM9 juta sebedau tu,” ku iya nerang baru.

    Kelimpah ari nya ku iya, pengawa ngadaka sholarship bukai baka Yayasan Sarawak enggau Yayasan Tun Taib mega meransang penambah ba penyampau tubuh bala nembiak nampung pelajar di palan pelajar tinggi sekalika di menua tu enggau di menua luar kelebih agi ba bidang perubat di Universiti Malaysia Sarawak (UNIMAS).

    Ku iya, perintah deka terus meri scholarship perubat ngagai nembiak perubat di UNIMAS ngambika dalam timpuh lima taun ti deka datai Sarawak deka nempa 200 iku lutur.

    Pia mega, iya meransang raban nembiak ngambu kus tauka pelajar bekaul enggau dagang ti ngaul ekonomi digital.

    Ku iya, penau mensia beguna endar nyadi sebagi ari ekosistem ti patut dikena mansang ari konvensional ngagai ekonomi digital.

    “Pelajar enggau pemerat ba penau digital, inovasyen enggau kreativiti patut nyadi palan pelin panjai ungkup Sarawak.

    “Aku gaga ulih meda UCTS udah ngadaka program pelajar dalam bidang injinir Perisian enggau Pengkomputeran Rangkaian sereta bisi aktiviti pemansik ba bidang Keselamatan Cybersecurity enggau Drone,” tambah iya baru. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads