Uggah: Inkubator digital deka ditumbuh di Betong. - Berita Iban Online

Header Ads

  • Baru Nyadi

    Uggah: Inkubator digital deka ditumbuh di Betong.

    BETANYAKA BERITA: Uggah betabi jari enggau bala temuai ke bisi datai ngagai Pengerami Makai Lemai Pemesai Enggau Peranak China Betong.

    Nya setipak enggau juluk perintah nengeri diatu ti keran ngemansangka Ekonomi Digital (ED)

    BETONG: Betong dipelaba deka ngembuan sebuah inkubator digital, iya nya Palan Inovasyen ti nangkup peminta perintah nuju ekonomi digital.

    Sapit Kepala Menteri Datuk Amar Douglas Uggah Embas madah, iya diatu benung ngiga rumah tauka premis dikena ngadaka palan nya.

    Nitih ku iya, nya seriris enggau juluk perintah ari baruh pegai Kepala Menteri Datuk Patinggi Abang Johari Tun Openg udah ngelanggur bemacham program bekaul enggau infrastruktur arus penyambung setipak enggau Ekonomi Digital ungkup Sarawak.

    “Berindik ari nya aku enggau pemesai dipebasa (YB) Gerald Rentap deka bejalaika inisiatif di Betong ngambika peranak di nengeri tu enda tinggal ari sukut teknologi kelebih agi internet.

    “Diatu, kami benung ngiga sebuah rumah tauka premis ti deka nyadi Palan Inovasi di Betong, sebaka enggau ti udah dilanchar Kepala Menteri di Sarikei bedau lama ke udah,” ku iya.

    Iya mansutka jaku nya lebuh bejaku ba Pengerami Makai Lemai Pemesai Enggau Peranak China Betong ti digulu Kaban Kunsil Nengeri (ADUN) Layar, Gerald Rentap Jabu ditu, malam kemari.

    Iya ke mega Menteri Betanam Betupi Moden, Tanah Adat enggau Pemansang Kandang Menua mega ngelalau peranak di Betong kelebih agi ke ngaul diri ba pengawa betanam betupi ngambika bela ngena teknologi pemadu baru ba pengawa dikereja sida.

    Taja pia ku iya, enggau pemisi perengka guna ke baka nya ila, peranak dilalau bejimat kelebih agi bekaul enggau propaganda ti tau ngerusak enggau ngerachun runding rayat.

    Uggah ke mega ADUN Bukit Saban madah, rayat enda patut pechayaka propaganda ti dikerembai nengah internet tang sida patut ngena perengka guna nya nyual produk sida ngagai menua luar.

    Nengah internet, nya ulih nyual asil tauka produk betanam betupi di Betong kelebih agi lada ngagai menua luar, ukai semina di Semenanjung aja tang lebih ari nya, ku iya.

    Berebak enggau nya, iya mega bisi ngemendarka sekeda projek pemansang di Betong nyengkaum pengawa ngaga palan baru pasar tamu Betong ti deka beguna belanja RM5 juta ti udah diagih ngagai opis kaunsil di Betong dikena bejalaika iya.

    “Kitai udah ngagihka RM5 juta dikena ngaga Pasar Tamu Betong ba palan baru lalu nya mungkur 3.7 ekar pemesai, ke alai se ekar ari pemesai nya dikena ngaga pasar nya empu lalu ke bukai endur engkah kerita ke beungkus RM500,000,” ku iya.

    Ku Uggah, ari sukut langkar fizikal pengawa ngaga nya agi dalam perambu lalu dikearap nya meri perengka guna ti pemadu manah ngagai pedagang.

    Ku iya, ba peminta projek bukai di Betong baka pengawa nyiri ketuai raban bansa kelebih agi Temenggong, ngangkatmanah sistem parit enggau pengelikun, iya deka ngatur berandau enggau ejensi bekaul.

    “Nya nyengkaum pengawa ngaga bank bukai ti nerima peminta mayuh ari rayat lalu kitai deka nganjung peminta laban bank endang beguna laban Betong majak mansang.

    “Kitai deka ngatur randau begulai enggau raban ke bekaul ti bejalaika pemansang di Betong tu laban perintah siruka penanggul ditapi rayat nadai ngira jalai pengarap enggau bansa,” ku iya nyemetak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads