Uggah milih SK St John Nanga Tiga nyadi sekula iru program pengelandik BI - Berita Iban Online

Header Ads

  • Baru Nyadi

    Uggah milih SK St John Nanga Tiga nyadi sekula iru program pengelandik BI

    BETONG: Sekula Primari (SK) St John Nanga Tiga, Ulu Layar dipilih Sapit Kepala Menteri Datuk Amar Douglas Uggah Embas nyadi sekula iru program ngangkatka pengelandik jaku Inggeris (BI).

    Iya madahka beduduk ari ke deka ngangkatka tikas penyulut pelajar BI ba bala nembiak sekula nya nyengkaum bala pengajar.

    “Aku enggau Robert Lawson Chuat (ti kala nyadi ADUN Bukit Saban) deka ngiru sekula tu (SK St John Nanga Tiga) endur bejalaika program khas Inggeris.

    “Jaku orang putih (BI) nya seiti jaku ke chukup diguna dikena ngiga penemu, laban enti enda nemu bejaku enda nemu maca jaku orang putih, nadai chara.

    “Nya nyau baka tua ke deka mansai tang enda nemu endur lubuk, begiga belah babas enda nemu dini endur deka bulih utai,” ku iya ke nyadi ADUN Bukit Saban.

    Uggah ti mega Menteri Betanam Betupi Moden, Tanah Adat enggau Pemansang Kandang Menua mansutka pekara nya lebuh ke bejaku ba pengerami serumpu makai malam SK ST John Nanga Tiga, Ulu Layar ke diatur PIBG sekula nya ditu, ensanus.

    Ngiru sekula endur bejalaika program ngangkatka pengelandik dalam BI nya senipak enggau penemu sereta peminta Menteri Pelajar, Sains enggau Pansik Teknologi Dato Sri Michael Manyin Jawong ti deka ke semua 82 ADUN ngiru ambis nadai sebuah sekula ke tuju program nya.

    Berebak enggau tu Uggah muji inisiatif ke deka dipejalaika PIBG sereta pengajar ti beperambu deka ngajar BI ngagai rumah panjai, ti dikearapka apai indai sama ulih nyaup sekula ngangkatka penyulut nembiak dalam jaku nya.

    Dikena nyukung lalu nentuka program nya mujur dipejalaika Uggah enggau Chuat deka ngungkupka belanja sepenyampau RM10,000 dikena meli bup BI sereta ungkup belanja RM7,000 dikena meri bup latih nyengkaum bup latih Matematik enggau Sains kelimpah ari BI.

    Uggah mega meri perambu runding ngagai sekula nya ngambika chakah agi ngatur program tauka aktiviti bekaul enggau BI baka coral speaking, public speaking enggau ke bukai.

    Kelimpah ari nya lebuh ke ngenang pasal pemutus peresa UPSR sekula nya, iya meransang apai indai ngambika besaup enggau bala pengajar ngemeratka pelajar anak.

    “Aku meda riput cikgu, ba taun 2014 GPS UPSR sekula tu iya nya 2.46 tauka 92.3 peratus, 2015 (GPS 2.77 tauka 57.4 peratus) enggau ba taun 2016 GPS 3.63 tauka 61.1 peratus. Lalu juluk ba taun 2017 3.25, ke patut iya juluk sekula tu patut manah agi ari taun 2014.

    “Nama kebuah pemutus nya baka nya. Pekara tu patut diperatika apai indai enggau pengajar. Maya anak pulai anang enda beratika nama utai ulih anak sereta apai indai patut berandau, sama besukung betulung enggau pengajar awakka anak uchu ichit maju,” ku iya ngelalau mensia mayuh ke bisi ngulu pengawa serumpu makai malam nya.

    Ba pengerami nya Uggah ngungkupka belanja sepenyampau RM30,000 ngagai PIBG sekula nya.
    Sama bisi datai ngulu pengerami nya, Robert Lawson Chuat ti kala nyadi ADUN Bukit Saban. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads